صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: ايديتا مخططة لتوسعات إقليمية، سيرا أعلنت عن أول استحواذ ليها في أمريكا + أخبار أرباح و أكتر في عدد النهاردة

مؤشر إي جي إكس ٣٠ زاد بنسبة ٠٫٢٧٪ وقفَل عند ٤٢٬٠٥٢ نقطة، مؤشر إي جي إكس ٧٠ زاد بنسبة ٠٫٦٠٪ وقفَل عند ١٢٬٩٤٧ نقطة، ومؤشر إي جي إكس ١٠٠ ارتفع بنسبة ٠٫٥٧٪ وقفَل عند ١٧٬١٥١ نقطة

قيمة التداول وصلت لـ٦٫١ مليار جنيه، من خلال ١٣٢٬٢٩٠ عملية على حوالي ٢٬٣٠٠٬٥٤٠٬٩٤٧ سهم

المستثمرين المحليين كانوا الوحيدين اللي سجلوا صافي شراء

أبرز الأسهم الكسبانة في السوق كله: جنوب الوادي للأسمنت (+١٢٫٢٤٪)، العالمية للاستثمار والتنمية (+١١٫٤١٪)، و وثائق شركة صندوق استثمار المصريين للاستثمار العقارى (+١٠٫٠٩٪)

أما الخسرانة: شارم دريمز للاستثمار السياحى (-٤٫٠١٪)، المالية و الصناعية المصرية (-٢٫٩١٪)، والاسكندريه الوطنيه للاستثمارات الماليه (-٢٫٦٩٪)

بالنسبة لمؤشر إي جي إكس ٣٠: أبرز الكسبانة كانت مصرف أبوظبي الإسلامي (+٣٫٣٪)، الاسكندرية للزيوت المعدنية (+٢٫٢٪)، وإي فاينانس (+٢٫٠٪)

أما الخسرانة: مصر للأسمنت (-١٫٦٪)، بالم هيلز للتعمير (-١٫٢٪)، وأوراسكوم كونستراكشون (-٠٫٩٪)

:إحصائيات مهمة تانية

سعر جرام الدهب عيار ٢٤ وصل لـ٦٬٤٧٥ جنيه، منخفض يوميًا بنسبة ٠٫٠١٪ ومرتفع شهريًا بنسبة ٪٢٫٨٤

الدولار وصل لـ٤٧٫٥٦ جنيه في البنك الأهلي المصري

١- شركة إيديتا للصناعات الغذائية بتستعد لتوسعات كبيرة في ٢٠٢٦، وخصصت جزء من خطة استثماراتها اللي قيمتها ٤ مليار جنيه للعام ده لتعزيز الإنتاج في العراق والمغرب، مع الحفاظ على التركيز الأساسي على مصر، حسب ما قال هاني برزي، رئيس مجلس الإدارة والعضو المنتدب، في مقابلة مع الشرق. (اقرا أكتر في قسم نظرة معمقة)

٢- سيرا جلوبال فينتشرز، الذراع الدولي للاستثمار لشركة سيرا للتعليم، استحوذت على حصة أقلية في مدرسة فالكون أكاديمي الأمريكية، واللي بتقدم خدماتها للجاليات العربية والآسيوية في منطقة واشنطن. التمويل هيستخدم لتوسيع الحرم الدراسي، فتح باب المرحلة الثانوية، وتطوير برامج متقدمة في العلوم والتكنولوجيا والهندسة. دي المرة الأولى لمجموعة تعليمية مصرية إنها تستثمر بشكل مباشر في سوق التعليم في أمريكا الشمالية، والخطوة دي جت بعد ٣ سنين من الدراسة، حسب ما قالت الشركة. قيمة سهم سيرا ارتفعت ٢٧٪ من بداية ٢٠٢٥

٣- جهاز مستقبل مصر للتنمية المستدامة زود حصته في شركة التعمير والاستشارات الهندسية من ١٫٣٦٪ لـ ١٢٫٨٩٪ في صفقة قيمتها ٢٣٦٫٥٧ مليون جنيه، شملت شراء ٢٫٧١ مليون سهم بسعر متوسط ٨٧٫٢٧ جنيه للسهم. سعر سهم الشركة ارتفع ١١٦٪ من بداية ٢٠٢٥

٤-  جنوب الوادى للاسمنت توصلت لتسوية مع عدة جهات حكومية لحل مديونيات وخلافات قديمة، بما فيها مشاكل قطع الغاز واختلافات مع هيئة التنمية الصناعية. الاتفاقية دي بتقفل ملفات قديمة وبتعكس تحسن العلاقة بين الشركة والجهات العامة. أسهم الشركة طلعت بنسبة ١٢٫٢٪ امبارح وبقت أكتر سهم كسبان في السوق، وقيمة السهم زادت ١٣٢٪ من بداية السنة لحد دلوقتي

٥- شركة الدلتا للتأمين حققت ارتفاع قوي في صافي أرباحها المجمعة للتسع شهور الأولى من ٢٠٢٥ بنسبة ٨٧٫٧٪، ووصلت ل ٦٨٩٫٠٣ مليون جنيه. إجمالي الإيرادات كمان ارتفع بشكل ملحوظ ووصل لـ ٨٨٥٫٧٩٤ مليون جنيه من يناير لغاية سبتمبر، مقابل ٥٧٦٫٩٠٢ مليون جنيه في نفس الفترة السنة اللي فاتت. للتذكير، الشهر اللي فات الشركة الأم، فالمور القابضة للاستثمار(المعروفة سابقاً بإسم القابضة المصرية الكويتية)، ومساهمين كبار تانيين باعوا حصصهم في دلتا للتأمين لشركة تأمين الوفاء المغربية في صفقة قيمتها حوالي ٤٫٨٩ مليار جنيه. دلوقتي الوفاء بقت مسيطرة على الشركة وقالت انها ناوية تشطبها من البورصة المصرية

٦- المصرية لنظم التعليم الحديثة سجلت تراجع بسيط في الأرباح السنوية بنسبة ٣٪ لـ ٤٫٩٤ مليون جنيه للسنة المالية المنتهية في يونيو ٢٠٢٥، مقابل ٥٫٠٨ مليون جنيه في السنة اللي فاتت، رغم إن الإيرادات ارتفعت ووصلت لـ ٤٧٫٤٦ مليون جنيه مقابل ٣٩٫٧ مليون جنيه. قيمة سهم الشركة ارتفعت تقريبًا ١٥٦٪ من بداية السنة

١١ ديسمبر ٢٠٢٥ (النهارده)

مطاحن مصر العليا – تاريخ صرف توزيعات الأرباح بقيمة ٢٠ جنيه للسهم، وتاريخ الاستحقاق كان يوم الاثنين ٨ ديسمبر

الشرقية ايسترن كومباني – تاريخ صرف توزيعات الأرباح بقيمة ١٫٥ جنيه للسهم، وتاريخ الاستحقاق كان يوم الاثنين ٨ ديسمبر

١٦ ديسمبر ٢٠٢٥

العامة للصوامع والتخزين – تاريخ استحقاق الأرباح بقيمة ٢٫٢٥ جنيه للسهم، وتاريخ التوزيع يوم الأحد ٢١ ديسمبر

البنك التجاري الدولي – تاريخ صرف الأسهم المجانية بمعدل ٠٫١ سهم لكل سهم أصلي، وتاريخ التوزيع يوم الأربعاء ١٧ ديسمبر

روبكس العالميه لتصنيع البلاستيك والاكريلك – تاريخ صرف الأسهم المجانية بمعدل ٠٫٠٦٨ سهم لكل سهم أصلي، وتاريخ التوزيع يوم الأربعاء ١٧ ديسمبر

١- معدل التضخم السنوي في المدن المصرية لشهر نوفمبر نزل لـ ١٢٫٣٪، بعد ما كان ١٢٫٥٪ في أكتوبر، مدعوم بانخفاض أسعار الأكل والشرب بنسبة ٢٫٦٪ . التضخم نزل بشكل كبير من أعلى مستوياته اللي كانت ٣٨٪ في سبتمبر ٢٠٢٣، بدعم من برنامج صندوق النقد الدولي بقيمة ٨ مليار دولار. البنك المركزي متوقع إن التضخم هيبقى بمعدل ١٤٫٥٪ في ٢٠٢٥ و١١٪ في ٢٠٢٦، لكنه أشار إن أسعار الطاقة والتبغ والكهرباء والمخاطر الجيوسياسية ممكن تبطّئ من وتيرة نزوله

٢- شركة سكاتك النرويجية حصلت على موافقة من مجلس الوزراء لإنشاء محطة طاقة شمسية مع بطاريات تخزين بقدرة ١٠٠ ميجاوات هتوفر كهرباء مستقرة على مدار الساعة. المشروع هيجمع ١٫٧ جيجاوات طاقة شمسية مع ٤ جيجاوات من أنظمة تخزين الطاقة بالبطاريات في أبو قير ونجع حمادي، مع نظام بيضمن استقرار الكهرباء. المجلس كمان وافق على إنشاء مزرعة رياح بقدرة ٩٠٠ ميجاوات في رأس شقير بواسطة أوراسكوم وإنجي الفرنسية، وتويوتا اليابانية. المشاريع دي متماشية مع هدف مصر إن مصادر الطاقة المتجددة تمثل ٤٢٪ من مزيج الكهرباء بحلول ٢٠٣٠

إيديتا للصناعات الغذائية ناوية تعمل دفعة كبيرة للنمو في في ٢٠٢٦، وخصصت جزء من استثماراتها البالغة ٤ مليار جنيه لتطوير الإنتاج في العراق والمغرب، مع استمرار التركيز الأكبر على السوق المصري، حسب ما قال رئيس مجلس الإدارة والعضو المنتدب هاني برزي لـالشرق

أولاً: التوسع المحلي

حوالي ٦٠٪ من ميزانية السنة الجاية هتروح لتوسيع العمليات في مصر، بما فيها تطوير نص مساحة الأرض المتبقية في موقع مصنعها  في المنطقة الصناعية بولاريس الزامل في ٦ أكتوبر وتجهيز مصنع تاني تم الاستحواذ عليه مؤخراً، حسب كلام برزي

إيه الجديد في التوسع الإقليمي؟

في العراق، خط إنتاج جديد هيشتغل قبل نهاية ٢٠٢٦ بعد ما اشترت الشركة مصنع هناك مؤخراً. وده بعد ما دخلت الشركة السوق العراقي السنادي بشراء حصة ٤٩٪ في طعمة جبر عباس مقابل ٨ مليون دولار، وده الحد القانوني للمستثمرين الأجانب. الشركة كمان قالت إنها ناوية تستثمر أكتر من ٢٧ مليون دولار في العراق خلال ال ٣ سنين الجاية

في المغرب، الشركة بتخطط تفتح خطوط إنتاج جديدة وقالت انها ناوية تستغل البلد كمركز تصدير لأسواق غرب إفريقيا، زي موريتانيا

ليه ده مهم؟

صادرات الشركة وصلت لـ٥٤٤.٩ مليون جنيه في الربع الثالث من ٢٠٢٥، بزيادة ٢.٢٪ عن نفس الفترة من السنة اللي فاتت، والصادرات مثلت حوالي ١٠٪ من إجمالي المبيعات خلال الفترة دي. المغرب كان متصدر الأداء الإقليمي بإجمالي ١٣٢ مليون جنيه في الربع، بزيادة ٨٪ سنوياً

:للتذكير

صافي أرباح الشركة وصل ٦٥٩.٢ مليون جنيه في الربع الثالث من ٢٠٢٥، بزيادة ٨٤.٥٪ على أساس سنوي، مدعوم بزيادة الإيرادات ٤٠.٤٪ لتصل لـ٥.٤٩ مليار جنيه. وده رفع أرباحها خلال التسع شهور الاولى من ٢٠٢٥ لـ١.٥٧ مليار جنيه، بزيادة ٤٢.٧٪ سنوياً

سعر سهم الشركة ارتفع ٨٦.٤٪ من بداية ٢٠٢٥

خلصنا جولتنا في السوق النهارده

استنوا التحديثات الجديدة بكرة