صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: زهراء المعادي رفضت عرض حكام شارك تانك، كوانتم إنفستمنت زودت حصتها في إيديتا، واخبار من جهينة والجيزة العامة للمقاولات وأطلس للاستثمار

مؤشر إي جي إكس ٣٠ ارتفع بنسبة ٠٫٧٧٪ وقفَل عند ٤١٬٤١٩ نقطة، مؤشر إي جي إكس ٧٠ صعد ١٫١٠٪ وقفَل عند ١٢٬٩٩٠ نقطة، ومؤشر إي جي إكس ١٠٠ زاد ٠٫٨٧٪ وقفَل عند ١٧٬١٨٣ نقطة

قيمة التداول وصلت لـ٥٫٨ مليار جنيه، من خلال ١٤٧٬٩٥٧ عملية على حوالي ٢٬٧٢٩٬٥٢٤٬٤٦٨ سهم

المستثمرين الإقليميين سجلوا صافي بيع

أبرز الأسهم الكسبانة في السوق كله: الزيوت المستخلصة ومنتجاتها (+١٦٫٦٧٪)،ديجيتايز للاستثمار والتقنية (+١٣٫٨٦٪)، والعبور للاستثمار العقاري (+٩٫٤٢٪)

أما الخسرانة: المصرية لنظم التعليم الحديثة (-١٠٫٩٧٪)، النصر لتصنيع الحاصلات الزراعية (-٤٫٩٩٪)، وارابيا للاستثمار والتنمية (-٤٫٠٤٪)

بالنسبة لمؤشر إي جي إكس ٣٠: أبرز الكسبانة كانت مصر للأسمنت (+٤٫٨٪)، ابن سينا فارما (+٣٫٣٪)، وأبو قير للأسمدة (+٢٫٥٪)

أما الخسرانة: راية القابضة (-٣٫٠٪)، القلعة للاستثمارات المالية (-٢٫٩٪)، وإعمار مصر (-٢٫٠٪)

:إحصائيات مهمة تانية

سعر جرام الدهب عيار ٢٤ وصل لـ٦٬٨٠٣ جنيه، مرتفع يوميًا بنسبة ٠٫٥٩٪ ومرتفع شهريًا بنسبة ٪٨٫٨٦

الدولار وصل لـ٤٧٫٤٨ جنيه في البنك الأهلي المصري

- زهرة المعادي للاستثمار والتنمية رفضت عرض الشراء الإجباري المقدم من أحمد طارق ومحمد فاروق، المعروفين كقضاة في برنامج شارك تانك مصر، للاستحواذ على 90% من الشركة بسعر 6.95 جنيه للسهم (اقرأ أكتر في قسم نظرة معمقة)

٢- مساهمين جهينة شالوا البند اللي كان بيمنع المنافس القطري بلدنّا من الحصول على مقاعد في مجلس الإدارة، وده بيفتح الطريق قدامهم لترشيح عضو في الجمعية العامة العادية الجاية. المعركة على مقاعد مجلس الإدارة متوقعة تكمل في جمعية الربيع بعد ما جهينه تقفل دفاتر السنة المالية ٢٠٢٥. جدير بالذكر إن قيمة سهم الشركة نزلت ١١% من بداية ٢٠٢٥

٣- حصة كوانتم إنفستمنت بي في في إيديتا للصناعات الغذائية ارتفعت لحد ٤٨٫٧٩٪ بعد تنفيذ صفقة كبيرة في البورصة. كوانتم اشترت حوالي ٥١٫٤٦ مليون سهم من إيديتا بقيمة إجمالية وصلت ل ١٫٢٦ مليار جنيه، بمتوسط سعر ٢٤٫٥ جنيه للسهم، من خلال آلية صفقات الحجم الكبير. سهم إيديتا مرتفع بحوالي ٩٧٪ من بداية السنة

٤- الهيئة العامة للرقابة المالية وافقت على إفصاح شركة الجيزة العامة للمقاولات والاستثمار العقاري بخصوص زيادة رأس المال. الشركة ناوية ترفع رأس المال المدفوع من ٢٨٨٫٥٤٢ مليون جنيه لـ ٤٣٢٫٨١٤ مليون جنيه من خلال إصدار ٧٢١٫٣٥٩٫٧٨٥ سهم بقيمة اسمية ٢٠ قرش للسهم، والزيادة ممولة من الاحتياطيات والأرباح المرحلة عن ٢٠٢٤. . جدير بالذكر إن سعر سهم الشركة ارتفع بنسبة ٥٣٫٤٪ من بداية ٢٠٢٥ 

٥- أطلس للاستثمار والصناعات الغذائية حصلت على موافقة الهيئة العامة للرقابة المالية لدعوة المساهمين للاكتتاب في زيادة رأس المال من ٦٥٫١٢ مليون جنيه إلى ١١٥٫١٢ مليون جنيه بقيمة اسمية ٠٫١٠ جنيه للسهم. الاكتتاب مفتوح للمساهمين اللي كانوا حاملين أو مشترين الأسهم لحد نهاية جلسة يوم الأحد ٤ يناير، ويبدأ من يوم الخميس ٨ يناير ولمدة ١٩ يومًا لغاية ٢٦ يناير، مع إمكانية غلق باب الاكتتاب لو تم تغطية كامل القيمة. قيمة سهم الشركة ارتفعت ١٦٥٪ من بداية السنة

٢٤ ديسمبر ٢٠٢٥

شركة العربية للأسمنت — تاريخ توزيع الأرباح بقيمة ٢٫٩٤ جنيه للسهم.  وتاريخ الاستحقاق كان ٢١ ديسمبر

٢٥ ديسمبر ٢٠٢٥

وادي كوم امبو لاستصلاح الاراضي - تاريخ استحقاق الأرباح  بقيمة ٧٫٠٧ جنيه للسهم، وتاريخ التوزيع ٣٠ ديسمبر

 سيرا للتعليم – تاريخ استحقاق الأرباح بقيمة ٠٫٣٤٣ جنيه للسهم، وتاريخ التوزيع ٣٠ ديسمبر

إي فاينانس للاستثمارات المالية والرقمية - تاريخ استحقاق الأرباح  بقيمة ٠٫١٧٤ جنيه للسهم، وتاريخ التوزيع ٣٠ ديسمبر

٢٨ ديسمبر ٢٠٢٥

الشمس للإسكان والتعمير – تاريخ توزيع الأرباح بقيمة ٠٫٠٥ جنيه للسهم. تاريخ الاستحقاق كان ٢٣ ديسمبر

١- توصل صندوق النقد الدولي والسلطات المصرية لاتفاق فني على المراجعتين الخامسة والسادسة في إطار برنامج "التسهيل الممدد"، والمراجعة الأولى في إطار "برنامج الصمود والاستدامة"، وده بيشق الطريق للحصول على تمويل قيمته ٢٫٧ مليار دولار، والمتوقع الموافقة الرسمية عليه في يناير. الاقتصاد المصري سجل نمو كويس جدًا، الناتج المحلي الإجمالي زاد ٤٫٤٪ في السنة المالية ٢٠٢٤/٢٠٢٥ و٥٫٣٪ في الربع الأول من السنة المالية ٢٠٢٥/٢٠٢٦، مدعوم بالقطاعات الصناعية والنقل والتمويل والسياحة. ٢٧٤ مليون دولار من تمويل برنامج "الصمود والاستدامة" رايح لدعم برامج الحماية الاجتماعية والإصلاحات الهيكلية، وصرف ٢٫٥ مليار دولار ضمن برنامج "التسهيل الممدد" مرتبط بإجراءات زي الاكتتابات العامة للشركات المملوكة للدولة—ومن المتوقع طرح بنك القاهرة السنة الجاية—وكمان تقليص دعم الوقود

٢- سفن عملاقة من سي إم ايه - سي جي أم الفرنسية وسفينة من ميرسك الدنماركية عدت قناة السويس امبارح. للتذكير، حركة الملاحة في قناة السويس من يوليو لحد نص ديسمبر حققت حوالي ١٫٩٧ مليار دولار، بزيادة ١٧٫٥٪ عن نفس الفترة السنة اللي فاتت، وده بيدل على عودة تدريجية للوضع الطبيعي بعد الاضطرابات اللي حصلت بسبب هجمات الحوثيين. رئيس هيئة قناة السويس أسامة ربيع متوقع إن الإيرادات هتوصل حوالي ٨ مليار دولار في ٢٠٢٦/٢٠٢٧ وحوالي ١٠ مليار دولار في ٢٠٢٧/٢٠٢٨، وده بيأكد على الدور الكبير للقناة كمصدر رئيسي للعملة الأجنبية لمصر

شركة زهراء المعادي للاستثمار والتعميررفضت رسميًا العرض الإجباري اللي قدمه المستثمرين أحمد طارق ومحمد فاروق، المعروفين كقضاة في برنامج شارك تانك مصر، للاستحواذ على ٩٠٪ من أسهم الشركة بسعر ٦٫٩٥ جنيه للسهم في صفقة قيمتها حوالي ٦٫٢٦ مليار جنيه. انخفضت قيمة سهم الشركة بنسبة ١٫٥٣٪ بنهاية التداول امبارح لتصل لـ٥٫٧٩ جنيه، مع مكاسب من بداية السنة لحد دلوقتي وصلت لـ٪٨٠٫٣٧

التفاصيل

سبب رفض العرض هو إن مجلس الإدارة أشَار لفجوة كبيرة بين سعر العرض والقيمة الدفترية العادلة للسهم، واللي متوقع إنها تزيد مع التوسع السريع والمشاريع الجديدة

 المساهمين الرئيسيين، اللي بيمثلوا ٥٣٫٩٪ من الشركة وكلهم مملوكين للدولة، أكدوا إن أي استحواذ محتمل محتاج تقييم دقيق وموافقات تنظيمية قبل أي خطوة. المساهمين الرئيسيين هما: الشركة القابضة للتشييد والتعمير (٢٣٫٤٨٪)، المعادي للتنمية والتعمير (١٤٫٧٩٪)، النصر للإسكان والتعمير (٩٫٣٢٪)، والمعمورة للتعمير والتنمية السياحية (٦٫٣١٪)

للتذكير، الاستحواذ جي في وقت الشركة بتتوسع فيه

الشهر اللي فات، مجلس إدارة الشركة وافق على شراء قطعة أرض بمساحة ٦٠ فدان في مدينة سفنكس الجديدة بقيمة إجمالية ٩٥٨٫١ مليون جنيه. الأرض هتتطور على مدار خمس سنين كمشروع سكني متكامل

Stay curious, stay invested — we’ll see you tomorrow.

Your daily market lens, signing off.