صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: مجلس إدارة أوراسكوم كونستراكشون وافق على الاندماج مع أو سي آي غلوبال، بالم هيلز مستهدفة مبيعات كبيرة من مشروع سعديات شورز في أبوظبي، والتوفيق للتأجير التمويلي إصدرت سندات مقوّمة ب ١٫٨٥ مليار جنيه

مؤشر إي جي إكس ٣٠ انخفض بنسبة ٠٫٠٥٪ وقفَل عند ٤١٬٩٤٠ نقطة، مؤشر إي جي إكس ٧٠ زاد بنسبة ٠٫٩٥٪ وقفَل عند ١٢٬٨٧٠ نقطة، ومؤشر إي جي إكس ١٠٠ ارتفع بنسبة ٠٫٨٩٪ وقفَل عند ١٧٬٠٥٣ نقطة

قيمة التداول وصلت لـ٦٫٨ مليار جنيه، من خلال ١٣٦٬١٦٣ عملية على حوالي ٢٬٩١٦٬٥٣٣٬٣١٤ سهم

المستثمرين المحليين كانوا الوحيدين اللي سجلوا صافي شراء

أبرز الأسهم الكسبانة في السوق كله: التعمير والاستشارات الهندسية (+١٩٫٩٩٪)، السويدي إليكتريك (+١٤٫٩٤٪)، والاسكندرية للخدمات الطبية  (+١١٫٩٦٪)

أما الخسرانة: الشرقية ايسترن كومباني (-٦٫٠٤٪)، مطاحن مصر العليا (-٥٫٣٥٪)، ومجموعة جي إم سي للاستثمارات الصناعية والتجارية المالية (-٤٫٥٠٪)

بالنسبة لمؤشر إي جي إكس ٣٠: أبرز الكسبانة كانت بلتون القابضة (+٤٫١٪)، راية القابضة (+٣٫٩٪)، والقلعة (+٢٫٩٪)

أما الخسرانة: الشرقية ايسترن كومباني (-٦٫٠٤٪)، أوراسكوم كونستراكشون (-١٫٩٪)، وفوري (-١٫٠٪)

:إحصائيات مهمة تانية

سعر جرام الدهب عيار ٢٤ وصل لـ٦٬٤٤٠ جنيه، منخفض يوميًا بنسبة ٠٫١٤٪ ومرتفع شهريًا بنسبة ٪٤٫٧٧

الدولار وصل لـ٤٧٫٥٥ جنيه في البنك الأهلي المصري

١- وافق مجلس إدارة أوراسكوم كونستراكشون على دمجها مع أو سي آي غلوبال، في خطوة بتمهّد لتكوين مجموعة واحدة للاستثمار والبنية التحتية مقرّها أبوظبي من خلال هيكل مبادلة أسهم. ولو المساهمين صدّقوا على الصفقة في يناير، الكيان الموحّد — اللي مساهمي أوراسكوم هيمتلكوا فيه ٥٣٪ — متوقّع يبدأ فعليًا في سنة ٢٠٢٦. (اقرا أكتر في قسم نظرة معمقة)

٢- بالم هيلز للتعمير داخلة سوق الإمارات لأول مرة بمشروعها الضخم سعديات شورز في أبوظبي، اللي من المتوقع يكلف حوالي ٥٫٤ مليار دولار في البناء ويستهدف يحقق مبيعات بتزيد عن ٧ مليار دولار من مشترين من أوروبا، أمريكا، مصر، وآسيا. (اقرا أكتر في قسم نظرة معمقة)

٣- شركة التوفيق للتأجير التمويلي أتمت إصدار سندات مُؤمَّنة بقيمة ١٫٨٥ مليار جنيه، وده أول إصدار تحت برنامج التوريق الجديد للشركة والسادس في تاريخها. السندات مدعومة بحسابات التأجير المستقبلية وهتساعد في تقوية المركز المالي وتمويل خطط التوسع. شارك في الاكتتاب البنك التجاري الدولي.، البنك الأهلي المصري، بنك مصر، بنك القاهرة، وكمان بنك التجاري وفا، والإصدار متقسم على ٣ شرائح بفائدة متغيرة لمدة تتراوح بين ٢٥ و٤٨ شهر. قيمة سهم الشركة ارتفعت ٤٢٪ من بداية السنة

٤-  وافق مجلس إدارة اكرو مصر للشدات والسقالات المعدنية على خطة لسحب الشركة اختياريًا من البورصة. وفي حال موافقة الجمعية العامة، المساهمين اللي هيختاروا الخروج بعد الشطب هيقدروا يبيعوا أسهمهم للشركة بسعر ١٢٩٫٢٩ جنيه للسهم، وده أعلى من الحد الأقصى اللي حددته الشركة قبل كده واللي كان ١٠٠ جنيه للسهم لتمويل عملية الشراء

١- أفادت تقارير إن إسرائيل وصلت لاتفاق نهائي مع شركاء ليفياثان على صفقة تصدير الغاز لمصر بقيمة ٣٥ مليار دولار. ومن المتوقع إن رئيس الوزراء نتنياهو يوافق عليها خلال أيام. الاتفاق بيحدد سعر ثابت وبيدي أولوية لتغطية الطلب المحلي الإسرائيلي لو حصلت أي اضطرابات في أماكن تانية. وذكرت التقارير إن الصفقة تمت تحت ضغط أمريكي، وده بييجي في وقت مصر ناوية تستمر في استيراد الغاز الطبيعي المسال لحد ٢٠٢٩–٢٠٣٠ لتعويض نقص الإنتاج المحلي اللي وصل ٤٫٢ مليار قدم مكعب يوميًا في حين إن الطلب اليومي وصل ٦٫٢ مليار قدم مكعب

٢- مصر ناوية تستثمر حوالي ٦٠ مليار دولار لإضافة ٢٣ جيجاوات كهربا بحلول ٢٠٣٠، أغلبها من مصادر متجددة، حسب تصريح وزير الاستثمار حسن الخطيب في مؤتمر في الرياض، ونقلته الشرق. وبحلول ٢٠٤٠، هتحتاج ٤٥ جيجاوات إضافية، ٩٠٪ منها من المتجددات، عشان تستوعب النمو السكاني. الحكومة كمان بتنسق مع مؤسسات التمويل التنموي لتقليل الاعتماد على محطات الغاز القديمة وزيادة المتجددات، لكن ربط الطاقة الجديدة بالشبكة هيحتاج استثمارات حوالي ٤٥ مليار دولار للبنية التحتية، خصوصًا مع بعد مزارع الرياح الكبيرة على البحر الأحمر عن الشبكة الحالية

أوراسكوم كونستراكشون — المدرجة في البورصة المصرية وبورصة أبوظبي — بتقدّم في الدمج المخطط مع أو سي آي غلوبال، لإنشاء مجموعة جديدة للاستثمار والبنية التحتية مقرها أبوظبي ومدعومة من ناصف ساويرس. مجلس الإدارة وافق على الصفقة، اللي هتضم أصول أو سي آي مع أوراسكوم عن طريق كيان جديد. أوراسكوم هتستحوذ على الكيان ده بإصدار أسهم لمساهمي أو سي آي، وبعدها أو سي آي هتتصفّى وتتشطب من يورونِكست أمستردام

آلية الدمج وتبادل الأسهم

مساهمين أو سي آي هيستلموا حوالي ٩٧٫٨ مليون سهم من أوراسكوم، بمعدل ٠٫٤٦ سهم أوراسكوم مقابل كل سهم أو سي آي. المعدل ده مبني على تقييم الأوراق المالية بـ ١٫٥٢ مليار دولار لأوراسكوم و١٫٣٥ مليار دولار لأو سي آي. لتسهيل الدمج، أوراسكوم كونستراكشون هتزود رأس المال المصدر من ١١٠٫٢ مليون دولار لـ ٢٠٧٫٤ مليون دولار عن طريق إصدار ٩٧٫٢ مليون سهم جديد بعلاوة إصدار ١٢٫٧٩ دولار، بينما الـ ٥٦١٫٨٠٠ سهم المتبقية هتيجي من حصة أو سي آي الموجودة بالفعل

الملكية والهيكل بعد الدمج

بعد إتمام الصفقة، مساهمين أوراسكوم هيملّكوا ٥٣٪ من المجموعة الموحدة، ومساهمي أو سي آي هيملّكوا ٤٧٪. الكيان الموحد هيشتغل باسم أوراسكوم وهيتقسم لتلاتة قطاعات: أوراسكوم إنفراستركشر، أوراسكوم كونستراكشون، وأوراسكوم كابيتال. الشركة هتفضل مدرجة في البورصة المصرية وبورصة أبوظبي ومسجلة في سوق أبوظبي العالمي، مع بقاء ناصف ساويرس رئيس غير تنفيذي

قدرة الاستثمار والاستراتيجية

الكيان الموحد هيقدر يستثمر أكتر من مليار دولار في مشروعات البنية التحتية والتراخيص، مستفيد من محفظة أوراسكوم اللي حوالي ١٣ مليار دولار ومن مبيعات أو سي آي الأخيرة. ناصف ساويرس قال إن المجموعة ممكن تضخ لحد ٥٠ مليار دولار في مشروعات البنية التحتية في أمريكا خلال العشر سنين الجايين، سواء برأس مالها أو بمشاركة الشركاء

 الدمج جي بعد أداء قوي خلال التسع شهور الاولى من ٢٠٢٥

أوراسكوم كونستراكشون أعلنت عن صافي أرباح التسع شهور الاولى من ٢٠٢٥ بقيمة ١٣٣٫٣ مليون دولار، بزيادة ٥٣٪ عن نفس الفترة السنة اللي فاتت، مدفوعة بتنفيذ ناجح لمشروعات البنية التحتية والطاقة والصناعة الإيرادات زادت ٤٨٪ ووصلت لـ ٣٫٤٣ مليار دولار، بقيادة مشروعات الشرق الأوسط وأفريقيا زي السكك الحديدية، مترو القاهرة والإسكندرية، ومشروعات الكهرباء والمياه، في حين أنشطة الشركة في أمريكا ساهمت بـ ١٫٤ مليار دولار الشركة، اللي بتمثل ٢٪ من وزن مؤشر إي جي إكس ٣٠، ارتفعت قيمة سهمها ٦٩٪ من بداية السنة

الخطوات الجاية

متوقع إن الجمعيات العامة غير العادية للشركتين هتنعقد في يناير علشان المساهمين يصوّتوا على الدمج. ولو وافقوا، توزيع أسهم أوراسكوم الجديدة على مساهمي أو سي آي متوقع يحصل في الربع الأول من ٢٠٢٦

بالم هيلز داخلة سوق الإمارات لأول مرة بمشروعها الكبير سعديات شورز في أبوظبي، اللي متوقع تكلفته حوالي ٥٫٤ مليار دولار في البناء. الشركة مستهدفة تحقق مبيعات بتزيد عن ٧ مليار دولار، وجذب مشترين من أوروبا، أمريكا، مصر، وآسيا، حسب تصريحات ياسين منصور لرويترز الأسبوع ده

:المشروع اللي مساحته ١٫٨٧ مليون متر مربع هيكون مكوّن من ٣ جزر متصلة ببعض

جزيرة زن: مستوحاة من التصميم الياباني

جزيرة ريف: فيها مارينا ومبانٍ بتصميم منحني يدمج العمارة اللي بتركز على الطبيعة

الجزيرة الثالثة: مخصصة للاسترخاء والعافية، مع سبا وخدمات رفاهية

المشروع كله هيقدّم ٦٢٠ فيلا و١٠٠٠ شقة

الجدول الزمني والموافقات

بالم هيلز شغالة على تأمين الموافقات النهائية، ومتوقع يبدأ البناء في أبريل أو مايو، وتسليم الوحدات حوالي ٣ سنين بعد كده، حسب تصريحات منصور لرويترز

المطور بيتفاوض مع بنوك الإمارات لتأمين تمويل المشروع، ومتوقع توقيع مسودات العقود قريب

بالم هيلز بتدرس مشاريع إضافية في أبوظبي ودبي، وكمان في السعودية، خصوصًا الرياض وجدة. الشركة كمان مخططة لإطلاق مشروع جديد في 6 أكتوبر خلال الربع الأول من ٢٠٢٦، جنب مشروع تاني في العاصمة الإدارية الجديدة

 أرباح بالم هيلز ارتفعت ٥٠٪ مقارنة بالسنة اللي فاتت ووصلت لـ٣٫٥ مليار جنيه في أول ٩ شهور من ٢٠٢٥، مع زيادة الإيرادات ٤٢٪ لـ٢٥٫٤ مليار جنيه مدفوعة بمبيعات جديدة قوية. في الربع التالت من ٢٠٢٥ لوحده، صافي الدخل قفز ٩٣٪ على أساس سنوي ووصل ١٫١ مليار جنيه، والإيرادات زادت ٤٢٪ لتصل ١٠٫٠ مليار جنيه. قيمة سهم الشركة ارتفعت ٣١٫٥٪ من بداية ٢٠٢٥

خلصنا جولتنا في السوق النهارده

استنوا التحديثات الجديدة بكرة