صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: أداء قوي لسي أي بي في الربع الثالث، عبور لاند أعلنت عن إنخفاض في أرباحها ، ومجموعة طلعت مصطفى أعلنت عن مشروع جديد كبير

مؤشر إي جي إكس ٣٠ ارتفع بنسبة ١٫٤٢٪ وقفَل عند ٣٨٦٢٢ نقطة، ومؤشر إي جي إكس ٧٠ زاد بنسبة ٠٫٧١٪ وقفَل عند ١٢١٦٣ نقطة، ومؤشر إي جي إكس ١٠٠ ارتفع هو كمان بنسبة ٠٫٨٠٪ وقفَل عند ١٥٩٩٠ نقطة

قيمة التداول وصلت لـ٥٫٩ مليار جنيه، من خلال ١٤٧٬٣٤٩ عملية على حوالي ١٫٤٦٢ مليار سهم

المستثمرين المحليين كانوا الوحيدين اللي سجلوا صافي شراء

أبرز الأسهم الكسبانة في السوق كله: مطاحن ومخابز جنوب القاهرة والجيزة (٪٢٠+)، السعودية المصرية للاستثمار والتمويل (٪١٢٫٩٦+)، وشركة النيل للأدوية والصناعات الكيماوية (٪٩٫٨٥+)

أما الخسرانة: شركة إيه كابيتال القابضة (-٪٦٫٣٢)، شركة كوبر للاستثمار التجاري والتطوير العقاري (-٪٥٫٢٥)، والحديد والصلب المصرية (-٪٤٫٩٨)

بالنسبة لمؤشر إي جي إكس ٣٠: أبرز الكسبانة كانت إعمار مصر للتنمية (٪٥٫٠+)، مجموعة طلعت مصطفى (٪٤٫٨+)، وبالم هيلز للتعمير (٪٤٫٥+)

أما الخسرانة: أبوقير للأسمدة (-٪٢٫١)، موبكو (-٪١٫٧)، وفوري (-٪١٫٠)

إحصائيات مهمة تانية

سعر جرام الدهب عيار ٢٤ وصل لـ٦٠٩١ جنيه، منخفض بنسبة ٠٫٦٤٪ يوميًا لكنه مرتفع بنسبة ١٫٠٧٪ شهريًا

الدولار وصل لـ٤٧٫٢٠ جنيه في البنك الأهلي المصري

١- البنك التجاري الدولي حقق قفزة كبيرة في أرباح الربع التالت من ٢٠٢٥، بعد ما صافي الربح زاد ٩٤٪ ووصل لـ٢٨٫٨ مليار جنيه مدعوم بارتفاع الإيرادات. سهم البنك طلع حوالي ٢٪ بعد إعلان النتائج وارتفع أكتر من ٣٥٪ من بداية السنة (اقرا أكتر في قسم نظرة معمقة)

٢- عبور لاند سجلت تراجع في أرباحها بنسبة ٨٫٤٪ على أساس سنوي خلال أول تسع شهور من ٢٠٢٥، ووصلت لـ٦٦١ مليون جنيه رغم ارتفاع الإيرادات لـ٨٫٢٤ مليار جنيه مقابل ٦٫٦٧ مليار جنيه في نفس الفترة من السنة اللي فاتت. الشركة كمان اعتمدت خطة لإنشاء مصنع جبنة جافة جديد في مزرعة عبور فارم. المشروع اللي تكلفته بين ١٢٠ و١٥٠ مليون جنيه هيتم تمويله ذاتيًا بهدف زيادة الربحية وفرص التصدير. سهم الشركة ارتفع ٢٫١٣٪ امبارح بعد الإعلان عن الأخبار دي، وحقق زيادة ٢٣٫٧١٪ من بداية ٢٠٢٥

٣- طلعت مصطفى القابضة بدأت تنفيذ مشروع سياحي متكامل جديد وبتكلفة ٧٨٨ مليون دولار ورا المتحف المصري الكبير، عن طريق شركتها التابعة الشركة العربية للاستثمارات الفندقية والسياحية "أيكون"، بالشراكة مع هيئة المجتمعات العمرانية الجديدة. المشروع هيضم فندق خمس نجوم، ومطاعم، ومنطقة تجارية، ووحدات فندقية وإدارية. (اقرا أكتر في قسم نظرة معمقة)

٤-  مصدر مطلع قال لـ انتربريز إن صندوق استثمار مرتبط بـ بلاك روك اشترى حصة نسبتها ١٫٨٪ في فوري في صفقة قيمتها ٨٧٦ مليون جنيه، وده بيعكس رجوع اهتمام المستثمرين الأمريكيين بسوق التكنولوجيا المالية في مصر بعد استحواذ أمازون على حصة في ڤاليو. وجدير بالذكر إن فوري ضاعفت أرباحها في النصف الأول من ٢٠٢٥ ووصلت لـ ١٫٣ مليار جنيه، بينما زادت الإيرادات بنسبة ٦٤٪ لـ٣٫٨ مليار جنيه. سهم الشركة طالع بنسبة ٦٧٫٢٥٪ من بداية السنة

٥- تعليم لخدمات الإدارة شهدت تنفيذ صفقة كبيرة على أسهمها خلال جلسة التداول يوم الاثنين، والصفقة شملت ٥١٫٦٣ مليون سهم بقيمة إجمالية ٨٠٠٫٢٥ مليون جنيه .الشركة كانت أعلنت عن زيادة أرباحها بنسبة ٥٪ في السنة المالية ٢٠٢٤/٢٠٢٥ لتوصل لـ ٥٨٠ مليون جنيه، بدعم من ارتفاع أعداد الطلاب وتحسين الأداء التشغيلي. سهم تعليم طالع ٥٥٫١٪ من بداية ٢٠٢٥

٤ نوفمبر ٢٠٢٥ (النهارده)

شركة مطاحن شرق الدلتا – تاريخ استحقاق توزيعات الأرباح بقيمة ٢٣ جنيهً للسهم، وتاريخ الصرف يوم الأحد ٩ نوفمبر

٥ نوفمبر ٢٠٢٥

المنصورة للدواجن - تاريخ الحق في الحصول على ٠٫٥٢ سهم مجاني لكل سهم أصلي. التوزيع هيكون يوم الخميس ٦ نوفمبر

٦ نوفمبر ٢٠٢٥ 

شركة مطاحن ومخابز شمال القاهرة – تاريخ صرف توزيعات الأرباح بقيمة ٣ جنيه للسهم، وتاريخ الاستحقاق كان يوم الأحد ٣ نوفمبر

شركة مطاحن مصر الوسطى – تاريخ صرف توزيعات الأرباح بقيمة ٥ جنيه للسهم، وتاريخ الاستحقاق كان يوم الأحد ٣ نوفمبر

شركة مصر لصناعة الكيماويات – تاريخ صرف توزيعات الأرباح بقيمة ٢ جنيه للسهم، وتاريخ الاستحقاق كان يوم الأحد ٣ نوفمبر

شركة الإسكندرية للأدوية والصناعات الكيماوية – تاريخ صرف توزيعات الأرباح بقيمة ٦٢٫٩٥ جنيه للسهم، وتاريخ الاستحقاق كان يوم الأحد ٣ نوفمبر

١-  أول طرح صكوك محلية في مصر جذب طلبات قوية جدًا، بإجمالي ١٤٫٩ مليار جنيه تقريبًا، حوالي خمس أضعاف الطرح المستهدف (٣ مليار جنيه). الإقبال الكبير خلى العائد ينزل لـ ٢١٫٥٦٪ بدل ٢٨٪، بعد ما وزارة المالية وافقت على ١٠ عروض بس من أصل ٦٣. الطرح مدته ٣ سنين ومرتبط بأصول مملوكة للوزارة في منطقة رأس شقير بالبحر الأحمر، وبييجي ضمن برنامج الصكوك اللي اتوسع لـ ٢٠٠ مليار جنيه بهدف تخفيف أعباء خدمة الدين

٢-  العجز الكلي لموازنة مصر زاد شوية ووصل لـ ٢٫٥٪ من الناتج المحلي خلال أول ٣ شهور من السنة المالية ٢٠٢٥–٢٠٢٦، رغم زيادة الإيرادات الضريبية بنسبة ٣٧٪ لـ ٥٥٦٫٢ مليار جنيه. الفائض الأولي تقريبًا اتضاعف ووصل لـ ١٧٨ مليار جنيه، يعني حوالي ٠٫٩٪ من الناتج المحلي، بفضل تحصيل ضرائب أحسن وانضباط مالي أكبر. ومع كده، مصروفات الفوايد اللي بلغت ٦٩٥٫٢ مليار جنيه خلت إجمالي الإنفاق يعلى لـ ١٫٢ تريليون جنيه

البنك التجاري الدولي أعلن عن ارتفاع كبير في أرباحه خلال الربع الثالث من سنة ٢٠٢٥، بعد ما صافي الربح قفز بنسبة ٩٤٪ على أساس سنوي ووصل لـ٢٨٫٨ مليار جنيه. الإيرادات كمان زادت بنسبة ١٣٪ عن نفس الفترة لـ٢٨٫٨ مليار جنيه برضو

سهم البنك أنهى جلسة امبارح على ارتفاع بنسبة ١٫٩١٪ بعد إعلان النتائج المالية، وارتفع إجمالاً بنسبة ٣٥٫٠٢٪ من بداية السنة. وجدير بالذكر إن البنك بيمثل حوالي تلت الوزن النسبي لمؤشر إي جي إكس ٣٠

في أول تسع شهور من ٢٠٢٥، صافي أرباح البنك وصل لـ٦٢٫١ مليار جنيه، بزيادة ٤٧٪ عن السنة اللي فاتت، مدعومة بارتفاع الإيرادات الإجمالية بنسبة ١٦٪ لتسجل ٨٣٫٧ مليار جنيه. البنك كمل توسّعه في أنشطته الأساسية، مع نمو محفظة القروض بنسبة ٣٠٪ من بداية السنة لتسجل ٥١٩ مليار جنيه، وزيادة في الودائع بنسبة ٨٪ تصل لـ١٫٠٤ تريليون جنيه

الإدارة قالت إن النتائج القوية بتعكس نجاح استراتيجية التحول الرقمي للبنك، واللي أثبتت قوة البنية التكنولوجية لسي آي بي والعائد الواضح من الاستثمار المستمر في التطوير والابتكار

مجموعة طلعت مصطفى القابضة أعلنت إن شركتها التابعة الشركة العربية للاستثمارات الفندقية والسياحية (أيكون) بدأت تنفيذ مشروع سياحي متكامل جديد وبتكلفة ٧٨٨ مليون دولار، في موقع مميز ورا المتحف المصري الكبير، بالشراكة مع هيئة المجتمعات العمرانية الجديدة

تفاصيل المشروع

المشروع بيقام على مساحة ٤٢٫٤ فدان، وهيضم فندق فاخر خمس نجوم بطاقة استيعابية ٤٩٥ غرفة بإدارة عالمية، بالإضافة لمجموعة مطاعم، ومنطقة تجارية، ووحدات فندقية وإدارية، وكمان منطقة ترفيهية عالمية

هيحقق المشروع إيرادات تشغيلية سنوية متكررة أكتر من ٨٢ مليون دولار، وإجمالي مبيعات عقارية بحوالي ٢٣٣ مليون دولار على مدار فترة التنفيذ

كمان المجموعة شغالة على تطوير فندق مينا هاوس التاريخي لإرجاعه لحالته الأصلية، بجانب تطوير فنادق تانية زي ماريوت الزمالك والوينتر بالاس بالأقصر، ضمن خطة الدولة لتحديث القطاع السياحي

سهم المجموعة ارتفع ٤٫٨٤٪ عند إغلاق جلسة امبارح بعد الإعلان عن المشروع، ومرتفع بنسبة ١٠٫٧٣٪ من بداية ٢٠٢٥

أداء مالي قوي مؤخراً

مجموعة طلعت مصطفى سجلت زيادة ٦٩٪ على أساس سنوي في صافي أرباح النصف الأول من ٢٠٢٥، لتصل لـ ٨٫١١ مليار جنيه، وحققت نمو ٤٤٪ في الإيرادات لتسجل ٢٤٫٤ مليار جنيه، بدعم من الأداء القوي لمشروعاتها في مصر والسعودية

المبيعات مدفوعة بالطلب المحلي والإقليمي

المبيعات المجمعة ارتفعت ٥٩٪ على أساس سنوي ووصلت لـ ٢١١ مليار جنيه في النصف الأول من ٢٠٢٥، بفضل الطلب القوي على مشروعات مدينتي، نور، سيليا، بريفادو، بنان في الرياض، وكمان ساوث ميد في الساحل الشمالي

مشروع جديد في شرم الشيخ

المجموعة أعلنت كمان عن خططها لإطلاق مشروع جديد ضخم في شرم الشيخ باسم "شرم باي"، واللي هيضم حوالي ٣ آلاف وحدة سكنية، ومن المتوقع يحقق مبيعات إجمالية بـ١٢٠ مليار جنيه، وهامش ربح صافي ٢٠٪، وإيرادات تشغيلية متكررة بـ ٣٠٫٢ مليار جنيه

توسع الإقليمي

الشركة وقعت اتفاق مع الهيئة الوطنية للاستثمار في العراق لتطوير مدينة متكاملة على مساحة ١٤ مليون متر مربع جنوب بغداد، هتضم حوالي ٤٦ ألف وحدة متعددة الاستخدامات، بإجمالي مبيعات متوقعة ١٧ مليار دولار

المجموعة كانت أطلقت قبل كده مشروع بانان في الرياض بتكلفة ١٧٫٥ مليار دولار، ومشروع تاني في عمان بإجمالي مبيعات متوقعة ٤٫٧ مليار دولار. بإجمالي ٣٣ مليار دولار من المشروعات الإقليمية، بهوامش ربح متوقعة بعد الضريبة بين ١٢٪ و٪١٧

بإجمالي محفظة أراضي بتوصل لـ ١٢٥٫٩ مليون متر مربع، بتقول المجموعة إنها دلوقتي ضمن أكبر ٣ مطورين عقاريين مدرجين في المنطقة

خلصنا جولتنا في السوق النهارده

استنوا التحديثات الجديدة بكرة