صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: تراجع في أرباح سي آي كابيتال، المطورون العرب القابضة، دومتي، وباندا + تحركات من جى بى كورب، سوديك، واكتر

مؤشر إي جي إكس ٣٠ نزل بنسبة ١٫٧٨٪ وقفَل عند ٣٩٬٧٢٥ نقطة، مؤشر إي جي إكس ٧٠ ارتفع بنسبة ٠٫٢٠٪ وقفَل عند ١٢٬٣٨٢ نقطة، ومؤشر إي جي إكس ١٠٠ كمان نزل بنسبة ٠٫١٣٪ ووصل لـ١٦٬٣٤٧ نقطة

قيمة التداول وصلت لـ٤٫٩ مليار جنيه، من خلال ١٠٧٬١٥١ عملية على حوالي ١٬٩١٨٬٤٢٢٬٢٥١ سهم

المستثمرين الأجانب كانوا الوحيدين اللي سجلوا صافي بيع

أبرز الأسهم الكسبانة في السوق كله: شركة قناة السويس لتوطين التكنولوجيا (+١٠٫١٣٪)، ارابيا للاستثمار والتنمية (+٧٫١٤٪)، والدولية للأسمدة والكيماويات (+٦٫٩٣٪)

أما الخسرانة: حق اكتتاب ماكرو جروب للمستحضرات الطبية (-١٦٫٣١٪)، النصر للملابس والمنسوجات (-٤٫٧٧٪)، والصناعات الهندسية المعمارية للانشاء والتعمير - ايكون (-٤٫٣٤٪)

بالنسبة لمؤشر إي جي إكس ٣٠: أبرز الكسبانة كانت القلعة للاستثمارات المالية  (+٥٫١٪)، مجموعة طلعت مصطفى (+٣٫١٪)، وإي اف جي القابضة (+٢٫٦٪)

أما الخسرانة: ابن سينا فارما (-٢٫٩٪)، أوراسكوم كونستراكشون (-٢٫٢٪)، وأوراسكوم للتنمية (-٢٫١٪)

إحصائيات مهمة تانية:

سعر جرام الدهب عيار ٢٤ وصل لـ٦٬٣٠٤ جنيه، مرتفع يوميًا بنسبة ٠٫٨٨٪ ومنخفض شهريًا بنسبة ٪١٫٣٦

الدولار وصل لـ٤٧٫٧١ جنيه في البنك الأهلي المصري

١- صافي أرباح سي آي كابيتال انخفض ٣١٫٧٪ ووصل لـ ١٫١١ مليار جنيه خلال التسع شهور الأولى من ٢٠٢٥، رغم زيادة الإيرادات لـ ٧٫٤٥ مليار جنيه، مدعومة بأداء قوي لشركاتها التابعة في القطاع غير المصرفي. (اقرأ أكتر في قسم نظرة معمقة)

٢- أعلنت شركة دومتي عن انخفاض صافي أرباحها بنسبة ٧١٫٦٪ على أساس سنوي ليصل ل ١١٥٫٥ مليون جنيه خلال التسع شهور الأولى من ٢٠٢٥، رغم أن الإيرادات فضلت مستقرة تقريبًا عند ٧ مليار جنيه. كجزء من خطط التوسع، الشركة هتستثمر٣٠٠ مليون جنيه لزيادة الطاقة الإنتاجية بنسبة ٤٠٪، بما في ذلك خط مخبوزات جديد في مصر بحلول الربع الأول من ٢٠٢٦ ومصنع جديد في العراق، وكمان هتعيد هيكلة أعمالها من خلال فصل كيانين: دومتي هتستمر برأس مال ١١٣ مليون جنيه، وكيان جديد باسم شركة منتجات داري الأوروبية للصناعات الغذائية هيتم تأسيسه برأس مال ٤٣٨ مليون جنيه، مع توقع وصول حجم الأعمال الإجمالي ل ١٣ مليار جنيه. للعلم، قيمة سهم الشركة نزلت أكتر من ١٦٪ من بداية السنة

٣- أعلنت شركة المطورون العرب القابضة عن انخفاض صافي أرباحها بنسبة ٢٩٪ على أساس سنوي ل ١٥٩٫٢٨ مليون جنيه خلال التسع شهور الأولى من ٢٠٢٥. كمان تراجعت الإيرادات لتصل ل ١٫١٩ مليار جنيه مقابل ١٫٤١ مليار جنيه خلال نفس الفترة من ٢٠٢٤. للتذكير، الشركة وافقت في أول الشهر على زيادة رأس المال، بهدف رفع رأس المال المصدر من ١٫٣٩ مليار جنيه ل ٢٫٣٩ مليار جنيه عن طريق طرح حقوق اكتتاب، مع إتاحة الفرصة للمساهمين الحاليين للاكتتاب حسب نسبهم. سهم الشركة منخفض بنسبة ٢٨٪ من بداية السنة

٤-  شركة آراب ديرى – باندا سجلت صافي خسائر ١٨٩ مليون جنيه خلال التسع شهور الأولى من ٢٠٢٥، مقابل صافي أرباح ١٤٣ مليون جنيه في نفس الفترة من ٢٠٢٤، بينما تراجعت المبيعات ١٣٪ لتصل إلى ١٫٨٧ مليار جنيه. الأداء الضعيف بيعكس الضغوط الكبيرة على التكاليف والأسعار اللي بتواجهها الشركة في قطاع الألبان. قيمة سهم الشركة نزلت ٠٫٦٣٪ من بداية ٢٠٢٥

:أخبار غير متعلقة بالأرباح

١- درايف للتمويل والخدمات المالية غير المصرفية، التابعة لـ جى بى كوربوريشن، حصلت على تمويل مشترك بقيمة ٥ مليار جنيه—وده أول قرض تمويل مشترك يتمنح لشركة في القطاع غير المصرفي في مصر. التمويل ده هيتركّز على نشاط السيارات في محفظتي التمويل الاستهلاكي والتخصيم، ويساعد الشركة على توسيع قاعدة عملائها وانتشارها الجغرافي وكمان إطلاق برامج جديدة تناسب احتياجات السوق المصري. جى بى كوربوريشن، اللي حققت زيادة في الأرباح بنسبة ٣٥٫١٪ خلال التسع شهور الأولى من ٢٠٢٥ لتصل ل ٢٫٤٢ مليار جنيه، ارتفع قيمة سهمها ٥٦٫١٠٪ من بداية السنة

٢- الجمعية العامة لثالث أكبر مطوّر عقاري مدرج في البورصة "سوديك" وافقت امبارح على عقد تأجير تمويلي بقيمة ٢٫٩٤ مليار جنيه مع شركة إي إف جي. المجلس وافق كمان على ابرام عقود معاوضة مع شركة بلتون القابضة وشركاتها التابعة، منها بيع مبنى في مشروع إيستاون، وست وحدات إدارية في مبنى ذا بورتال في سوديك وست، وتأجير ١٠٠ مكان انتظار في مباني إيستاون ديستريكت نيو كايرو في القاهرة الجديدة. الشركة—اللي إدارتها قالت في بداية الأسبوع إنها عندها أكتر من ٢٥٠٠ فدان لسه ما اتباعوش—سجّل سهمها ارتفاع ١٢٫٦٤٪ من أول ٢٠٢٥

٣- يو للتمويل الاستهلاكي (المعروفة ب إسم فاليو) متوقعة تحقق إيرادات ٢١ مليار جنيه في ٢٠٢٥، بعد ما وصلت ١٨ مليار جنيه في التسع شهور الأولى من ٢٠٢٥، حسب ما قال العضو المنتدب وليد حسونة في مقابلة مع إقتصاد الشرق. حسونة متوقع إن الأرباح هتزيد ٦٥٪ مقارنة بالسنة اللي فاتت لتصل ٧٠٠ مليون جنيه في ٢٠٢٥، بعد ما سجلت قفزة ١٣٩٪ في صافي الأرباح خلال التسع شهور الأولى من ٢٠٢٥ لتصل ٥٤١٫٤٤ مليون جنيه، نتيجة تضاعف عمليات التمويل الاستهلاكي ٣ مرات مقارنة بـ٢٠٢٤. للتذكير، فاليو عملت ضجة كبيرة لما دخلت البورصة في يونيو، وسهمها ارتفع أكتر من ٨٥٢٪ ليصل ٧٫٤٠ جنيه وقتها. السهم وصل ٩ جنيه بنهاية تعاملات امبارح

٢٧ نوفمبر ٢٠٢٥ 

مصر للأسمنت – تاريخ صرف توزيعات الأرباح بقيمة ٠٫٥ جنيه للسهم، وتاريخ الاستحقاق كان يونيو ٢٣

راميدا – تاريخ صرف توزيعات الأرباح بقيمة ٠٫٠٥٣ جنيه للسهم، وتاريخ الإستحقاق كان هو ٧ يوليو. هتقوم الشركة برضو بتوزيع ٠٫٣٢٣ سهم مجاني لكل سهم في ٣ ديسمبر، وتاريخ الاستحقاق ٢ ديسمبر

١- تحالف قطري-مصري قرب يتم اختياره لإعادة تطوير مقر الحزب الوطني الديمقراطي السابق في وسط القاهرة، في مشروع قيمته ٥ مليارا دولار، حسب ما قال مصدر حكومي لـ انتربرايز. المشروع اتأخر بسبب تقلبات العملة وإعادة تقييم قيمة المشروع بعد تعويم الجنيه المصري. ووفقًا لتقرير من إقتصاد الشرق امبارح عن مصدر حكومي، صندوق مصر السيادي لسه بيراجع حوالي ١٠ عروض منافسة تانية. في الاول، كانت خطة إعادة تطوير مقر الحزب تشمل إنشاء فندق سبع نجوم ارتفاعه ٢٢٠ متر، مع وحدات سكنية وموقف سيارات متعدد الطوابق، لكن لسه مش واضح قد إيه التصميم النهائي هيتغير

٢- مسؤول حكومي قال  لـ"الشرق" امبارح بشرط عدم ذكر اسمه، إن شركات شل وبتروناس حصلوا على موافقة الحكومة لتصدير ست شحنات سنويًا من الغاز المسال من مصنع إدكو قرب الإسكندرية، كل شحنة بحوالي ١٥٠ ألف متر مكعب. الاتفاق، اللي مستمر لغاية ٢٠٢٩، جاي ضمن حوافز الحكومة اللي أعلنت عنها في أغسطس ٢٠٢٤، واللي بتسمح للشركات الأجنبية بتصدير جزء من إنتاجها الجديد مع استخدام العائدات لسداد مستحقات الحكومة المتأخرة لموردي الغاز. احتياجات مصر اليومية من الغاز الطبيعي حوالي ٦٫٢ مليار قدم مكعب، مقابل إنتاج حوالي ٤٫٢ مليار قدم مكعب

أعلنت مجموعة سي آي كابيتال عن صافي أرباح وصل ١٫١١ مليار جنيه خلال التسع شهور الأولى من ٢٠٢٥، منخفضة ٣١٫٧٨٪ على أساس سنوي مقارنة بـ ١٫٦٣ مليار جنيه في نفس الفترة من ٢٠٢٤. وده حصل رغم زيادة طفيفة في الإيرادات المجمعة اللي وصلت لـ ٧٫٤٥ مليار جنيه مقابل ٧٫١٥ مليار جنيه في نفس الفترة السنة اللي فاتت

سعر سهم الشركة ارتفع ٣٨٫٢٪ من بداية السنة

الشركات التابعة للقطاع غير المصرفي فضلت المحرك الرئيسي

الأداء التشغيلي استمر في الاعتماد على منصة الخدمات المالية غير المصرفية التابعة للمجموعة. شركة كوربليس للتأجير التمويلي سجلت نمو ٢٠٨٪ على أساس سنوي في الحجوزات الجديدة لتصل لـ ١١٫٤ مليار جنيه، وارتفع حجم محفظتها القائمة لـ ١٧٫٧ مليار جنيه. في نفس الوقت، شركة سي آي للتمويل العقاري وسعت محفظتها القائمة ٦٩٪ لتصل لـ ٢٫٧ مليار جنيه، بدعم من ١٫٥ مليار جنيه قروض جديدة ونمو قوي في الإيرادات والأرباح. كمان وزعت شركة ريفي ٢٫٩ مليار جنيه قروض جديدة ووسعت شبكة فروعها لتصل لـ ٢٠٤ فرع في ٢١ محافظة

البنك الاستثماري حافظ على نشاطه والأصول المدارة وصلت لمستوى تاريخي

البنك الاستثماري حقق إيرادات ١٫٢ مليار جنيه، والوساطة كانت مسؤولة عن ٧٢٩ مليون جنيه، في حين ارتفعت إيرادات إدارة الأصول ٢٢٪ لتصل لـ ٣٠٩ مليون جنيه. الأصول المدارة للمجموعة وصلت لمستوى قياسي قدره ١٣٠٫١ مليار جنيه، مدعومة بتدفقات جديدة ومهام إدارة أصول إضافية. الذراع الاستشاري كمان أتم ١٨ صفقة في أسواق الأسهم، وأسواق الديون، والاندماجات والاستحواذات بإجمالي قيمة ٣٩٫٩ مليار جنيه

الخطة المستقبلية

المجموعة عينت مدير تنفيذي جديد لقيادة أعمال الأسهم الخاصة ضمن استراتيجية أوسع موجهة لمنطقة الشرق الأوسط وشمال أفريقيا، وحصلت على رخصة رأس مال مغامر،و ده هيتيح لها التوسع في منتجات استثمارية جديدة. الإدارة أكدت إن المجموعة هتستمر في التركيز على توسيع عمليات القطاع غير المصرفي، وتنويع منتجاتها، والحفاظ على قدرتها على الصمود وسط تقلبات السوق المستمرة

خبر تاني من الشركة

شركة سي آي لإدارة الأصول، التابعة لـ سي آي كابيتال، أنهت الاكتتاب في صندوقها الجديد المتوافق مع الشريعة «جولد مصر» بنسبة تغطية تجاوزت أكتر من ضعف المطلوب. باب الاكتتاب اتفتح أول الشهر، وبيتيح للمستثمرين الدخول في أداة بتستثمر في سبائك دهب عالية النقاء. الصندوق بيقدم عائد تراكمي يومي ومعاه نظام سحب جوائز للمشتركين، وكمان من غير أي رسوم اشتراك

خلصنا جولتنا في السوق النهارده

استنوا التحديثات الجديدة بكرة