صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: ماريدايف وقعت اتفاقية جديدة في قطر، أوراسكوم للتنمية حصلت على أرضٍ جديدة لتوسيع مشروع مكادي هايتس+ أخبار من ماكرو جروب ومصرف أبو ظبي الإسلامي

مؤشر إي جي إكس ٣٠ زاد بنسبة ٠٫٤٨٪ وقفَل عند ٤١٬٩٦٣ نقطة، مؤشر إي جي إكس ٧٠ انخفض بنسبة ٠٫٣٦٪ وقفَل عند ١٢٬٧٤٨ نقطة، ومؤشر إي جي إكس ١٠٠ انخفض بنسبة ٠٫١٣٪ وقفَل عند ١٦٬٩٠٣ نقطة

قيمة التداول وصلت لـ٧٫٣ مليار جنيه، من خلال ١٥٠٬٦٧٦ عملية على حوالي ٤٬٣٤٦٬٤١٠٬٠١٩ سهم

المستثمرين المحليين كانوا الوحيدين اللي سجلوا صافي شراء

أبرز الأسهم الكسبانة في السوق كله: الاسماعيلية الوطنية للصناعات الغذائية (+١٨٫٣١٪)، مجموعة عامر القابضة (+٩٫١٣٪)، وسي آي كابيتال القابضة (+٧٫٠٪)

أما الخسرانة: السويدي إليكتريك (-١٣٫٩٥٪)، وثائق شركة صندوق استثمار المصريين للاستثمار العقارى (-٥٫٧٧٪)، و ارابيا انفستمنتس هولدنج (-٥٫١٥٪)

بالنسبة لمؤشر إي جي إكس ٣٠: أبرز الكسبانة كانت إعمار مصر (+٣٫٧٪)، المصرية للاتصالات (+٣٫٢٪)، ومصرف أبو ظبي الإسلامي (+٢٫٣٪)

أما الخسرانة: الشرقية ايسترن كومباني (-٢٫٦٪)، القلعة للاستثمارات المالية (-٢٫٦٪)، و مجموعة طلعت مصطفى (-١٫٤٪)

:إحصائيات مهمة تانية

سعر جرام الدهب عيار ٢٤ وصل لـ٦٬٤٠٧ جنيه، منخفض يوميًا بنسبة ٠٫١٨٪ ومرتفع شهريًا بنسبة ٪٤٫٩٤

الدولار وصل لـ٤٧٫٤٧ جنيه في البنك الأهلي المصري

١- شركة ماريدايف للخدمات الملاحية والبترولية أعلنت إن واحدة من شركاتها التابعة وقّعت امبارح عقد طويل الأجل في قطر لتقديم خدمات دعم الصيانة والإنتاج في قطاع البترول، بقيمة تتجاوز ١٠ مليون دولار سنويًا. (اقرا أكتر في قسم نظرة معمقة)

٢- أعلنت أوراسكوم للتنمية إن شركة مرتفعات مكادي للتنمية السياحية التابعة ليها وقّعت اتفاقية مع الحكومة لتطوير قطعة أرض جديدة مساحتها ١٫٠٢١ مليون متر مربع ملاصقة لمشروع مكادي هايتس على ساحل البحر الأحمر. هيتم تفعيل الاتفاقية بداية من يناير ٢٠٢٦، وهيتم دمج الأرض الجديدة ضمن المشروع الحالي، وبكده هتبقى إجمالي مساحة مكادي هايتس حوالي ٤٫٧٥ مليون متر مربع. المخطط الجديد للأرض بيشمل وحدات سكنية، شقق فندقية، مساحات تجارية، وفندق. ، قيمة سهم أوراسكوم للتنمية ارتفعت بنسبة ٣٧٪ من بداية السنة

٣- شركة بلتون القابضة قالت امبارح إنها بتدرس الاستحواذ بالكامل على شركة إماراتية مملوكة لواحدة من الشركات الشقيقة للمساهم الرئيسي فيها، شركة شيميرا الإماراتية. جدير بالذكر إن سهم بلتون طالع بنسبة حوالي ٥٦٪ من بداية السنة

٤- شركة ماكرو جروب للمستحضرات الطبية أعلنت إن تغطية الاكتتاب في زيادة رأس المال بتاعها وصلت لـ٩٩٪، وده بيقفل فعليًا أول وآخر مرحلة بعد اكتتاب المستثمرين في حوالي ٢٫٨٢٢ مليار سهم بقيمة حوالي ٥٦٤٫٥١ مليون جنيه. سهم الشركة محقق صعود بنحو ١٢٧٪ من بداية السنة

٥- مصرف أبو ظبي الإسلامي – مصر أعلن إن المرحلة الأولى من زيادة رأس المال بتاعتو اتغطّت بنسبة ٩٨٫٥٥٪، بعد الاكتتاب في حوالي ٢٩٥٫٦٣٣ مليون سهم. المرحلة تانية هيتطرح فيها باقي الأسهم — حوالي ٤٫٣٦ مليون سهم — من غير أي قيود على نسب الاكتتاب. إجمالي أسهم الزيادة هو ٣٠٠ مليون سهم بسعر ١٠ جنيه للسهم. جدير بالذكر إن سهم البنك طالع حوالي ٦٥٪ من بداية السنة

١- عبور السفن في قناة السويس من بداية يوليو لغاية امبارح وصل ٥٨٧٤ سفينة بحمولات صافية ٢٤٧٫٢ مليون طن، محققة إيرادات ١.٩٧ مليار دولار، بزيادة ١٧٫٥٪ عن ١.٦٧٧ مليار دولار في نفس الفترة من السنة اللي فاتت. رئيس هيئة قناة السويس أسامة ربيع قال امبارح إنه متوقع الإيرادات توصل حوالي ٨ مليار دولار في ٢٠٢٦/٢٠٢٧ وحوالي ١٠ مليار دولار في ٢٠٢٧/٢٠٢٨.القناة مصدر رئيسي للعملة الصعبة لمصر، وحققت إجمالي إيرادات ٤٠ مليار دولار من ٢٠١٩ لـ ٢٠٢٤

٢- صندوق الاستثمار النرويجي نورفاند وشركة الطاقة الفرنسية إي دي إف ضخوا امبارح استثمارات في مشروع أوبليسك للطاقة الشمسية — أكبر محطة شمسية تحت الإنشاء في إفريقيا — في نجع حمادي. الشركة المنفذة سكاتك هتحتفظ بـ ٦٠٪ من حقوق التشغيل، في حين إن كل من إي دي إف ونورفاند هيمتلكوا ٢٠٪. بعد الصفقة، نورفاند هتمتلك كمان ٢٥٪ من الشركة القابضة للمشروع، و٧٥٪ هتفضل مع سكاتك. المشروع هينطلق على مرحلتين: المرحلة الأولى بقدرة ٥٦١ ميجاوات +  قوة تخزين ٢٠٠ ميجاوات/ساعة، والمرحلة التانية هتضيف ٥٦٤ ميجاوات طاقة شمسية — وكل ده متوقع يشتغل خلال ٢٠٢٦. المشروع متوافق مع هدف مصر إن مصادر الطاقة المتجددة تمثل ٤٢٪ من مزيج الكهرباء بحلول ٢٠٣٠

أعلنت شركة الخدمات الملاحية والبترولية ماريدايف إن شركتها التابعة «ماريدايف أوف شور بروجكتس مصر» وقّعت عقود جديدة في قطر لتنفيذ أعمال دعم الصيانة والإنتاج في قطاع البترول القطري، لمدة ١٥ سنة وبقيمة سنوية ١٠.١٥ مليون دولار. التنفيذ هيبدأ في الربع الأول من ٢٠٢٨

ماريدايف مش وقفة عند قطر: في أواخر أكتوبر الشركة أعلنت خطط لتأسيس شركة تابعة بمسؤولية محدودة في الإمارات. التفاصيل هتتعلن بعد موافقة الجمعية العامة

اجتمع وزير البترول كريم بدوي مع وفد من ماريدايف مؤخراً عشان يناقشوا خطط التوسع. الشركة قدّمت مقترحات لتطوير الحقول المتقادمة وزيادة الإنتاج المحلي. وأكد وفد ماريدايف إن الشركة مستهدفة توسيع نشاطها في مصر خصوصًا في الإنتاج والخدمات البحرية المتكاملة

حققت ماريدايف أرباح ١٠.٨٨ مليون دولار في الفترة من يناير لنهاية يونيو ٢٠٢٥، مقابل ٥٫١٤ مليون دولار في نفس الفترة من ٢٠٢٤. وارتفعت الإيرادات لـ ١٢٤٫٦٧ مليون دولار مقارنة بـ ١٠٧٫٢٣ مليون دولار في النص الأول من ٢٠٢٤

قيمة سهم الشركة ارتفعت ٢٤٪ من بداية السنة

خلصنا جولتنا في السوق النهارده

استنوا التحديثات الجديدة بكرة