صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: تحديثات من إيبيكو وإيديتا + اخبار أرباح من رواد السياحة وأطلس للاستثمار واكتر في عدد النهاردة

مؤشر إي جي إكس ٣٠ انخفض بنسبة ٠٫٠٥٪ وقفَل عند ٤٢٬٠٣٣ نقطة، مؤشر إي جي إكس ٧٠ هبط بنسبة ٠٫٠٥٪ وقفَل عند ١٢٬٩٤٠ نقطة، ومؤشر إي جي إكس ١٠٠ تراجع بنسبة ٠٫٠٤٪ وقفَل عند ١٧٬١٤٤ نقطة

قيمة التداول وصلت لـ٧٫١ مليار جنيه، من خلال ١٤٣٬٥٢٣ عملية على حوالي ٢٬٨٦٤٬٥١٣٬٤٧١ سهم

المستثمرين المحليين كانوا الوحيدين اللي سجلوا صافي شراء

أبرز الأسهم الكسبانة في السوق كله: جولدن تكس للاصواف (+١٤٫٠٦٪)، جنوب الوادي للأسمنت (+٨٫١٨٪)، والملتقي العربي للاستثمارات (+٦٫٦٠٪)

أما الخسرانة: أوراسكوم كونستراكشون (-٥٫٥٪)، العامة لمنتجات الخزف والصيني (-٣٫١٨٪)، و وثائق شركة صندوق استثمار المصريين للاستثمار العقارى (-٣٫٠٥٪)

بالنسبة لمؤشر إي جي إكس ٣٠: أبرز الكسبانة كانت ابن سينا فارما (+٢٫٦٪)، مدينة مصر (+٢٫١٪)، و أبوظبي الإسلامي (+١٫٧٪)

أما الخسرانة: أوراسكوم كونستراكشون (-٥٫٥٪)، إي إف جي القابضة (-١٫٦٪)، ومجموعة طلعت مصطفى (-١٫٦٪)

:إحصائيات مهمة تانية

سعر جرام الدهب عيار ٢٤ وصل لـ٦٬٥٩١ جنيه، مرتفع يوميًا بنسبة ٠٫١٦٪ ومرتفع شهريًا بنسبة ٪٢٫٥٣

الدولار وصل لـ٤٧٫٤٩ جنيه في البنك الأهلي المصري

١- شركة إيبيكو حصلت على الموافقات النهائية من هيئة الدواء المصرية والهيئة العامة للتنمية الصناعية لمصنعها “إيبيكو ٣” لإنتاج المستحضرات والبدائل البيولوجية بمدينة العاشر من رمضان، وده بيفتح الطريق لبدء التشغيل في الربع الأول من ٢٠٢٦. الشركة كمان أطلقت رسميًا مستحضر بيولوجي جديد للتوزيع المحلي عبر هيئة الشراء الموحد، واستلمت أول طلب تصدير لدولة ناميبيا، وقالت إن ده بيعكس الثقة في جودة منتجاتها وقدرتها على التوسع في الأسواق الأفريقية. سعر سهم الشركة ارتفع ٥٥٪ من بداية ٢٠٢٥

٢- شركة إيديتا للصناعات الغذائية متوقعة إن مبيعاتها توصل حوالي ٢٠٫٥ مليار جنيه في ٢٠٢٥. الخبر ده جه بعد ما قالت الشركة انها ناوية تستثمر حوالي ٤ مليار جنيه في ٢٠٢٦ لتوسيع الإنتاج في مصر والمغرب والعراق. الشركة هتزود أربع خطوط إنتاج جديدة وهتبدأ التشغيل في العراق في بداية السنة الجاية، بهدف رفع المبيعات لـ٢٦ مليار جنيه وتقوية تواجدها إقليميًا. قيمة سهم الشركة ارتفعت بنسبة ٨٨٫٥٪ من بداية ٢٠٢٥

٣- وافقت الهيئة العامة للرقابة المالية على إن شركة كوبر للاستثمار التجاري والتطوير العقاري تدعو قدامى المساهمين للاكتتاب في زيادة رأس المال، اللي هيزود رأس المال المصدر من ٧٨٫٨٣ مليون جنيه لـ٢٣٦٫٤٩ مليون جنيه. حق الاكتتاب لقدامى المساهمين هينتهي يوم ٢١ ديسمبر ٢٠٢٥، وفترة الاكتتاب هتبدأ من ٢٤ ديسمبر ٢٠٢٥ لحد ٢٦ يناير ٢٠٢٦. وقيمة سهم الشركة ارتفعت بنسبة ٤٩٪ من بداية السنة

٤- أظهرت القوائم المالية لشركة أطلس للاستثمار والصناعات الغذائية ارتفاع خسائرها بشكل حاد خلال التسع شهور الأولى من ٢٠٢٥، لتصل ١٧٫٣ مليون جنيه، بزيادة ٥١٧٫٩٪ على أساس سنوي مقابل ٢٫٨ مليون جنيه في نفس الفترة من السنة اللي فاتت. في المقابل، ارتفعت الإيرادات لتسجل ٣١٫٠٦ مليون جنيه مقابل ٢٨٫٢٣ مليون جنيه في نفس المدة. على الرغم من كده، قيمة سهم الشركة ارتفعت ١٦٣٪ من بداية السنة
 
٥- أظهرت القوائم المالية لشركة رواد السياحة تحول الشركة للخسائر خلال التسع شهور الأولى من ٢٠٢٥، بعد ما كانت محققة أرباح في نفس الفترة من ٢٠٢٤. الشركة سجلت خسائر بلغت ٥٫٥١ مليون جنيه مقابل أرباح ١٧٫٠٨ مليون جنيه في الفترة المقابلة، بينما ارتفعت الإيرادات تقريبًا لنحو ١٤٩٫٥١ مليون جنيه مقابل ٧٠٫٨٢ مليون جنيه السنة اللي فاتت. قيمة أسهم الشركة انخفضت ١٠٪ منذ بداية ٢٠٢٥.

٦- شركة إم أو جروب بتستعد لطرح من ١٠٪ لـ٢٠٪ من أسهمها في البورصة المصرية في النصف الثاني من ٢٠٢٦ بعد ما تخلص تحويل الكيان لشركة مساهمة. الشركة المنتجة للحلوى والشوكولاتة والبسكويت كمان ناوية تضخ استثمارات بـ ١٠ مليون دولار السنة الجاية لإضافة خطوط إنتاج جديدة ومضاعفة الصادرات. وبحلول ٢٠٢٦، بتستهدف توسيع نشاطها ليصل لـ ٨٠ سوق، وتحقيق صادرات بـ ١٢ مليون دولار، وزيادة المبيعات المحلية بنسبة لا تقل عن ٥٠٪ بدعم خطوط الإنتاج الجديدة

١٦ ديسمبر ٢٠٢٥

العامة للصوامع والتخزين – تاريخ استحقاق الأرباح بقيمة ٢٫٢٥ جنيه للسهم، وتاريخ التوزيع يوم الأحد ٢١ ديسمبر

البنك التجاري الدولي – تاريخ صرف الأسهم المجانية بمعدل ٠٫١ سهم لكل سهم أصلي، وتاريخ التوزيع يوم الأربعاء ١٧ ديسمبر

روبكس العالميه لتصنيع البلاستيك والاكريلك – تاريخ صرف الأسهم المجانية بمعدل ٠٫٠٦٨ سهم لكل سهم أصلي، وتاريخ التوزيع يوم الأربعاء ١٧ ديسمبر

١٧ ديسمبر ٢٠٢٥

شركة القناة للتوكيلات الملاحية —تاريخ استحقاق الأرباح بقيمة ٢٫٨٩٩ جنيه للسهم. وتاريخ التوزيع الاثنين ٢٢ ديسمبر

٢١ ديسمبر ٢٠٢٥

شركة العربية للأسمنت — تاريخ استحقاق الأرباح بقيمة ٢٫٩٤ جنيه للسهم.  وتاريخ التوزيع هيكون الأربعاء ٢٤ ديسمبر

١- شركة دانة غاز أعلنت عن اكتشاف غاز جديد في دلتا النيل البرية باحتياطيات بتتراوح بين ١٥ و٢٥ مليار قدم مكعب، مع إنتاج مبدئي متوقع لا يقل عن ٨ ملايين قدم مكعب يوميًا، في خطوة بتدعم خطة مصر لزيادة الإنتاج وتقليل الاعتماد على الغاز المسال المستورد. وده بييجي في وقت الإنتاج المحلي وصل فيه لحوالي ٤٫٢ مليار قدم مكعب يوميًا، في حين إن الاستهلاك اليومي عند ٦٫٢ مليار قدم مكعب وبيوصل لـ ٧٫٢ مليار قدم مكعب في فصل الصيف. الاكتشاف ده جزء من برنامج استثماري بحوالي ١٠٠ مليون دولار ممكن يضيف لحد ٨٠ مليار قدم مكعب احتياطيات قابلة للاستخراج، ويوفر على الاقتصاد المصري أكتر من مليار دولار على المدى الطويل

٢- مصر بتستهدف جذب حوالي ٦٫٥ مليار دولار لتجهيز ٧ مناطق حرة جديدة خلال ال ٣ سنين الجايين، على مساحة تقارب ٩٩١ فدان، وبصادرات سنوية متوقعة حوالي ٢٫٣٥ مليار دولار، حسب ما قال مسؤول ل الشرق. وفي نفس الوقت، الحكومة بتجهز تعديلات تنظيمية علشان تحوّل المناطق دي لمناطق متخصصة تشجع الاستثمار في صناعات زي الغزل والنسيج، ومكونات السيارات، والإلكترونيات، واللوجستيات، والكيماويات، والطاقة الشمسية

٣- بلومبرج شايفة إن تعافي الاقتصاد المصري مكمل وبوتيرة أسرع، مع توقعات إن النمو يوصل لـ ٤٫٤٪ في ٢٠٢٥ و٤٫٧٪ في ٢٠٢٦، مدعوم باستقرار سوق الصرف، والإصلاحات الاقتصادية، وبرنامج صندوق النقد. النمو قفز لـ ٥٫٣٪ في الربع التالت — أقوى أداء من أكتر من تلات سنين — بدعم من تحسن إيرادات قناة السويس والسياحة والصناعة، رغم إن ضغوط التضخم لسه مكملة الفترة الجاية

خلصنا جولتنا في السوق النهارده

استنوا التحديثات الجديدة بكرة