صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: راية وافقت مبدئياً على عرض معدل لـ راية فودز، وأخبار من ايجيترانس، مدينة مصر، و أكتر

مؤشر إي جي إكس ٣٠ ارتفع بنسبة ٠٫٢١٪ وقفَل عند ٤١٬٥٠٨ نقطة، مؤشر إي جي إكس ٧٠ صعد ٠٫٧٦٪ وقفَل عند ١٣٬٠٨٩ نقطة، ومؤشر إي جي إكس ١٠٠ زاد ٠٫٥٧٪ وقفَل عند ١٧٬٢٨١ نقطة

قيمة التداول وصلت لـ٥٫٥ مليار جنيه، من خلال ١٣٧٬٤٤٥ عملية على حوالي ٢٬٨٣٦٬٨٨٠٬٠٦٤ سهم

المستثمرين الإقليميين كانوا الوحيدين اللي سجلوا صافي بيع

أبرز الأسهم الكسبانة في السوق كله: مطاحن ومخابز جنوب القاهرة والجيزة (+٢٠٫٠٪)، مطاحن ومخابز شمال القاهرة (+١٦٫١١٪)، ومطاحن ومخابز الاسكندرية (+١٣٫٦٤٪)

أما الخسرانة: حق اكتتاب شركة كوبر للاستثمار التجاري والتطوير العقاري (-١٧٫٦٥٪)، ديجيتايز للاستثمار والتقنية (-٩٫٠٥٪)، وجيتكس للاستثمارات التجارية والصناعية (-٥٫٢٦٪)

بالنسبة لمؤشر إي جي إكس ٣٠: أبرز الكسبانة كانت راية القابضة (+٤٫٣٪)، راميدا (+٢٫٢٪)، ومصر للأسمنت (+١٫٥٪)

أما الخسرانة: مصر للألومنيوم (-١٫٥٪)، القلعة للاستثمارات المالية (-١٫٣٪)، وأوراسكوم كونستراكشون (-١٫٣٪)

:إحصائيات مهمة تانية

سعر جرام الدهب عيار ٢٤ وصل لـ٦٬٨٥٧ جنيه، مرتفع يوميًا بنسبة ٠٫٧٩٪ ومرتفع شهريًا بنسبة ٪٧٫٦٨

الدولار وصل لـ٤٧٫٥٤ جنيه في البنك الأهلي المصري

١- راية القابضة وافقت على عرض مُحدَّث من هيليوس للاستحواذ الكامل على راية فودز، ولسه القرار النهائي بعد التقييم والمفاوضات. الشركة تعتبر تاني أكبر مُصدّر للفواكه والخضار المجمدة في مصر. (اقرأ أكتر في قسم نظرة معمقة)

٢- شركة المصرية لخدمات النقل (ايجيترانس) أعلنت إن أرباحها الصافية في أول ٩ شهور من ٢٠٢٥ نزلت ٤٣٫٥٪ على أساس سنوي ووصلت ١١١٫٣ مليون جنيه. لكن الإيرادات ارتفعت بقوة من ٥٨٠٫٣ مليون جنيه لـ٩٠١٫٩ مليون جنيه، وده بيعكس زيادة النشاط في النقل رغم تراجع هوامش الربح. سعر سهم الشركة ارتفع بنسبة ٥٦٪ من بداية ٢٠٢٥

٣- شركة نهر الخير أعلنت إن أرباحها الصافية في أول ٩ شهور من ٢٠٢٥ زادت ٤٥٫٣٪ على أساس سنوي ووصلت ٧١٫١ مليون جنيه. الإيرادات كمان ارتفعت من ٢٠١٫٦ مليون جنيه لـ ٣٣٩٫٧ مليون جنيه، وده بيعكس نمو قوي في نشاطها الزراعي والخدمات البيئية. أسهم الشركة ارتفعت تقريبًا بنسبة ٨٪ من بداية السنة

٤- وقعت مدينة مصر مذكرة تفاهم مع شركة فوروارد للمقاولات والاستثمار العقاري لتنفيذ أعمال إنشاءات بقيمة ١٫٤٥ مليار جنيه في مشروعها الرائد "سراي". الاتفاق بيشمل تنفيذ ٩٥ فيلا، ومن المتوقع الانتهاء من أعمال البناء على نهاية ٢٠٢٧. أسهم مدينة مصر ارتفعت بنسبة ١٢٪ من بداية السنة

٥- الشركة العربية لإدارة وتطوير الأصول استقبلت عرض من شركة تطوير الأصول العقارية لتطوير أرضها في طنطا بمساحة حوالي ٢٤٬٨٠٠ متر مربع. بموجب العرض، العربية هتمتلك ٣٢٪ من الشراكة،. هيتم تقديم شيكين بقيمة ٥٠ مليون جنيه، واحد عند توقيع العقد والتاني خلال شهر من صدور الرخصة. العرض هيتم مناقشته في أول مجلس إدارة جاى. قيمة سهم الشركة ارتفعت بنسبة ٥٨٪ من بداية السنة

٢٥ ديسمبر ٢٠٢٥

وادي كوم امبو لاستصلاح الاراضي - تاريخ استحقاق الأرباح  بقيمة ٧٫٠٧ جنيه للسهم، وتاريخ التوزيع ٣٠ ديسمبر

 سيرا للتعليم – تاريخ استحقاق الأرباح بقيمة ٠٫٣٤٣ جنيه للسهم، وتاريخ التوزيع ٣٠ ديسمبر

إي فاينانس للاستثمارات المالية والرقمية - تاريخ استحقاق الأرباح  بقيمة ٠٫١٧٤ جنيه للسهم، وتاريخ التوزيع ٣٠ ديسمبر

٢٨ ديسمبر ٢٠٢٥

الشمس للإسكان والتعمير – تاريخ توزيع الأرباح بقيمة ٠٫٠٥ جنيه للسهم. تاريخ الاستحقاق كان ٢٣ ديسمبر

١- مصر بتستعد لتوقيع اتفاق نهائي مع شركة "سكاتك" النرويجية في الربع التاني من ٢٠٢٦ لتنفيذ أكبر مشروع للطاقة الشمسية والتخزين في البلد بقدرة إجمالية ٥٧٠٠ ميجاواط، حسب ما قال مسؤول حكومي لـ"الشرق". المشروع هيشمل ١٧٠٠ ميجاواط من محطات الطاقة الشمسية في المنيا و٤٠٠٠ ميجاواط من بطاريات التخزين موزعة على أبوقير ونجع حمادي وجنوب القاهرة، والشركة المصرية لنقل الكهرباء هتشتري كل الإنتاج. المسؤول أضاف إن المشروع بيعكس ثقة المستثمرين الدوليين المتزايدة في قطاع الطاقة النظيفة في مصر، وده متوافق مع هدف الحكومة إن ٤٢٪ من مزيج الكهرباء ييجي من مصادر متجددة بحلول ٢٠٣٠

٢- وزارة الاستثمار المصرية بتدرس فكرة تبادل أراضي لإنشاء مناطق لوجستية في ست دول أفريقية، حسب ما قال وزير الاستثمار حسن الخطيب. الفكرة إن مصر تاخد أراضي في الدول دي لمراكز تصدير، وفي المقابل الدول الشريكة تاخد أراضي في موانئ مصر. القطاع الخاص هيدير المناطق دي، وكمان ممكن هيئة مستقبل مصر تساعد في إدارة النظام، وده هيوسّع نشاط الوزارة من الزراعة والاستصلاح للبنية التحتية للتجارة عبر الحدود

مجلس إدارة راية القابضة وافق على عرض جديد من هيليوس للاستثمار للاستحواذ الكامل على راية فودز. القرار النهائي هيعتمد على نتيجة المفاوضات وتحديد القيمة العادلة للشركة من خلال المستشار المالي المستقل، وبعدها المساهمين هيقدروا يشوفوا تفاصيل العرض ويقيموه

خلفية عن الصفقة

في أكتوبر٢٠٢٤، هيليوس قدمت عرض لشراء لحد ٤٩٪ من راية فودز مقابل ٤٠ مليون دولار، وقتها كان تقييم الشركة حوالي ٦٥ مليون دولار. بعد كده قدمت هيليوس عرض تاني، لكن لسه التفاصيل المالية مش معلنة

أهمية راية فودز

راية فودز، اللي تأسست سنة ٢٠١٦، تعتبر تاني أكبر مُصدّر للفواكه والخضار المجمدة في مصر، وبتصدر لأكتر من ٥٠ دولة. الشركة ساهمت بنسبة ٤٫٣٪ (حوالي ١٫٩٥ مليار جنيه) من إجمالي إيرادات راية القابضة خلال أول ٩ شهور من ٢٠٢٥، اللي وصلت لـ ٤٥.٥ مليار جنيه

وجهة استخدام الفلوس

راية القابضة قالت قبل كده إنها ناوية تستخدم جزء من حصيلة الصفقة لتوسيع شركة «أمان للتمويل الاستهلاكي»، حسب تصريحات المدير التنفيذي أحمد خليل

رد فعل السوق

سهم راية القابضة ارتفع ٤٫٣٣٪ وبقى أعلى سهم صعودًا في مؤشر إي جي إكس ٣٠، وده رفع مكاسبه من بداية السنة لـ %١٩.٩٣

Stay curious, stay invested — we’ll see you tomorrow.

Your daily market lens, signing off.