صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: مدينة مصر أرباحها قلت ٦٫٦٪؛ راميدا ارتفعت ١٥٫١٪؛ بنك البركة مصر زاد ٣٣٪؛ والمصرف المتحد انخفض ٪٩

مؤشر إي جي إكس ٣٠ نقص بنسبة ٠٫٤١٪ وقفَل عند ٤٠٬٢٦١ نقطة، مؤشر إي جي إكس ٧٠ ارتفع بنسبة ٠٫٢٦٪ وقفَل عند ١٢٬١٣٧ نقطة، ومؤشر إي جي إكس ١٠٠ زاد بنسبة ٠٫٠٥٪ وقفَل عند ١٦٬٠٨٥ نقطة

قيمة التداول وصلت لـ٦٫٣ مليار جنيه، من خلال ١٤٤٬١٤٧ عملية على حوالي ١٬٤٢٩٬٠٢٩٬٢١١ سهم

المستثمرين الإقليميين كانوا الوحيدين اللي سجلوا صافي بيع

أبرز الأسهم الكسبانة في السوق كله: شركة قناة السويس لتوطين التكنولوجيا (٪٢٠+)، المصرف المتحد (٪١٩٫٩٧+)، وبنك البركة مصر (٪١١٫٥٠+)

أما الخسرانة: الالومنيوم العربية (-٪١٠٫٢٩)، الاسكندرية لتداول الحاويات والبضائع (-٪٨٫٠٧)، وفيركيم مصر للأسمدة والكيماويات (-٪٤٫٩٠)

بالنسبة لمؤشر إي جي إكس ٣٠: أبرز الكسبانة كانت مصر للأسمنت (٪٥٫٨+)، مصرف أبو ظبي الإسلامي (٪٤٫٢+)، وبلتون القابضة (٪٣٫٧+)

أما الخسرانة: أوراسكوم للتنمية (-٪٤٫٣)، ابن سينا فارما (-٪٣٫٧)، وجهينة (-٪٣٫٧)

إحصائيات مهمة تانية

سعر جرام الدهب عيار ٢٤ وصل لـ٦٬٢٩٨ جنيه، مرتفع يوميًا بنسبة ٠٫٤٩٪ وكمان ارتفع شهريًا بنسبة ٪٢٫١٨

الدولار وصل لـ٤٧٫١٩ جنيه في البنك الأهلي المصري

١- مدينة مصر للاسكان والتعمير سجلت صافي أرباح ٢٫٤ مليار جنيه خلال التسع شهور الأولى من ٢٠٢٥، بتراجع ٦٫٦٪ على أساس سنوي وسط قاعدة إيرادات أضعف وهوامش أرباح أضيق. الشركة حققت إيرادات بقيمة ٧٫٤ مليار جنيه خلال نفس الفترة، بتراجع ١٫٠٪ على أساس سنوي مع استقرار النشاط بعد “نمو الاستثنائي" السنة إللي فاتت، حسب ما قالت إدارة الشركة. أسهم المطور العقاري زادت بنسبة ١٣٫١٢٪ من بداية السنة. (اقرأ أكتر في قسم نظرة معمقة)

٢- راميدا سجلت إيرادات صافية ٢٫٩٦٤ مليار جنيه في أول تسع شهور من ٢٠٢٥، بزيادة ٦٦٫١٪ على أساس سنوي، في حين ارتفع صافي الربح ١٥٫١٪ على أساس سنوي ليصل ل ٢٨١ مليون جنيه، مدعوم بزيادة الأسعار، وانتعاش المبيعات، والأداء التشغيلي القوي. سهم الشركة ارتفع بنسبة ٢٥٫٧٥٪ من بداية ٢٠٢٥. (اقرأ أكتر في قسم نظرة معمقة)

٣-  بنك البركة مصر أعلن عن صافي أرباح قدره ٢٫٩٥ مليار جنيه خلال أول تسع شهور من ٢٠٢٥، بزيادة ٣٣٪ مقارنة بنفس الفترة من السنة اللي فاتت. وصل صافي دخل البنك من العائد خلال الفترة ل ٥٫٥٢ مليار جنيه، مقابل ٤٫٣٩ مليار جنيه في نفس الفترة من ٢٠٢٤، وهو اللي دعم نمو الأرباح بشكل عام. سهم البنك ارتفع بنسبة ١١٫٥٠٪ بعد إعلان نتائج الأرباح، وحقق زيادة ٢٢٫٧٥٪ من بداية السنة

٤- المصرف المتحد سجل صافي ربح قدره ١٫٨ مليار جنيه خلال التسع شهور المنتهية في سبتمبر ٢٠٢٥، بتراجع ٩٪ مقارنة بـ١٫٩٩ مليار جنيه في نفس الفترة من ٢٠٢٤. ارتفع صافي دخل البنك من الفوائد لـ١٠٫٤٩ مليار جنيه خلال، مقابل ٩٫٦٣ مليار جنيه في نفس الفترة من السنة اللي فاتت، وده دعم قاعدة إيرادات البنك. سهم المصرف ارتفع بنسبة ١٩٫٩٧٪ بعد إعلان النتائج، وحقق زيادة ٢٩٪ من بداية السنة

٥- شركة القاهرة للدواجن سجلت زيادة في صافي أرباحها بنسبة ٢٩٪ على أساس سنوي لتوصل لـ٢٫٣٦ مليار جنيه خلال التسع شهور الأولى من ٢٠٢٥، مقابل ١٫٨٣ مليار جنيه في نفس الفترة من السنة اللي فاتت. الإيرادات ارتفعت لـ١١٫٩٧ مليار جنيه مقارنة بـ١٠٫٦٥ مليار جنيه السنة اللي قبلها، وده بيعكس نمو تشغيلي قوي. سهم الشركة ارتفع بنسبة ٨٣٪ من بداية ٢٠٢٥

٦- شركة الإسماعيلية مصر للدواجن سجلت قفزة كبيرة في صافي أرباحها بنسبة ٤٦٦٪ على أساس سنوي لتصل ل ٣٩٫٢٦ مليون جنيه خلال التسع شهور المنتهية في سبتمبر ٢٠٢٥، مقابل ٦٫٩٤ مليون جنيه في نفس الفترة من السنة اللي فاتت. إيرادات الإيجارات كمان زادت لأكتر من الضعف ووصلت لـ٤٢٫٣٧ مليون جنيه. سهم الشركة ارتفع بنسبة ٥٥٪ من بداية ٢٠٢٥

٧- المصرية للدواجن سجلت زيادة في صافي خسائرها بنسبة ٦٣٪ على أساس سنوي خلال التسعة شهور المنتهية في سبتمبر ٢٠٢٥، ووصلت الخسائر لـ٨ مليون جنيه، مقابل ٤٫٩٢ مليون جنيه في نفس الفترة من السنة اللي فاتت. إيرادات الشركة ارتفعت لـ٨٫٩٢ مليون جنيه خلال نفس الفترة، مقارنة بـ٦٫٢٦ مليون جنيه السنة اللي قبلها. سهم الشركة زاد بنسبة ٤٧٪ من بداية السنة

٨- القلعة للاستثمارات المالية بتدرس إصدار سندات قابلة للتحويل بقيمة تصل لـ٢٠٠ مليون دولار لتقليل الديون وتمويل استثمارات الشركات التابعة. كمان الشركة بتفكر في طرح خمس شركات تابعة في البورصة المصرية خلال السنتين الجايين، وفي الوقت نفسه ممكن تتخارج من شركتين وتبيع حصة جزئية في شركة تانية مع الاحتفاظ بحصة مسيطرة. سهم الشركة ارتفع بأكتر من ٢٠٪ من بداية السنة

١٢ نوفمبر ٢٠٢٥ (النهاردة)

مطاحن ومخابز الإسكندرية – تاريخ صرف توزيعات الأرباح بقيمة ٠٫٧٥ جنيه للسهم، وتاريخ الاستحقاق كان امبارح 

١٣ نوفمبر ٢٠٢٥

الإسكندرية لتداول الحاويات والبضائع – تاريخ صرف توزيعات الأرباح بقيمة ١٫٨١ جنيه و٠٫٠٠٣ دولار للسهم، وتاريخ الإستحقاق كان يوم الإثنين، ١٠ نوفمبر

١- مصر ناوية تزود إنتاجها من النفط الخام حوالي ١١٫٥٪ ليوصل لـ٥٨٠ ألف برميل يومياً في السنة المالية ٢٠٢٦-٢٠٢٧، مقارنة بـ٥٢٠ ألف دلوقتي، حسب ما قال مسؤول حكومي لـ"إقتصاد الشرق" بشرط عدم ذكر اسمه. المسؤول أوضح إن الزيادة دي جت بعد ما الحكومة سدّت المدفوعات المتأخرة لشركاء النفط الأجانب، وطوّرت الحقول الحالية، وشغّلت مشاريع جديدة عشان تعوّض الانخفاض اللي وصل لـ٥٠٧ آلاف برميل يومياً في يونيو ٢٠٢٥— أقل مستوى من حوالي ٤٧ سنة

٢-  حكومة الكويت بتجري مفاوضات لتنفيذ حزمة استثمارية بقيمة ٣ مليار دولار في مصر، ومتوقع الاتفاق على الدفعة الأولى يتم قبل نهاية ٢٠٢٥ أو في بداية ٢٠٢٦، حسب ما قال مصدرين حكوميين لـ انتربريز. الاستثمارات المخطط لها هتشمل الموانئ والبنية التحتية للوجستيات والصناعة والطاقة المتجددة، وكمان ممكن تساهم في خصخصة المطارات اللي الحكومة شغّالة على تجهيزها دلوقتي مع المؤسسة المالية الدولية. التمويل هييجي جزئيًا من ودائع الكويت في البنك المركزي المصري، وكمان من استثمارات مباشرة في الأصول الصناعية والبنكية والتكنولوجية، حسب ما ذكرت الجريدة

٣- مصر ناوية تزرع لحد مليون فدان في شمال السودان على مدار الثلاث سنين الجايين، على أن تبدأ المرحلة الأولى بـ٢٥٠ ألف فدان السنة الجاية، حسب ما قال مصدر حكومي لـ"إقتصاد الشرق". المحاصيل المستهدفة هتكون قمح وذرة وفول صويا وأرز، ومصر هتحشد المستثمرين من القطاع الخاص، والسودان هيقدّم الأراضي، بشرط استقرار الأوضاع الأمنية. الاتفاق جه بعد لقاء وزيري الزراعة المصري والسوداني في أكتوبر، وكانوا اتكلموا كمان عن زيادة صادرات الأسمدة المصرية وتوفير تقاوي للمحاصيل

شركة مدينة مصر للإسكان والتعمير أعلنت عن صافي أرباح ٢٫٤ مليار جنيه خلال التسع شهور الأولى من ٢٠٢٥، بتراجع ٦٫٦٪ مقارنة بنفس الفترة من السنة اللي فاتت، وسط هوامش أرباح أضيق وقاعدة إيرادات أضعف شوية

محركات الإيرادات

إجمالي الإيرادات وصل ٧٫٤ مليار جنيه خلال ٩ أشهر، مدفوع بنمو قوي في إيرادات تسليم الوحدات، اللي تضاعفت على أساس سنوي وربع سنوي

المبيعات الجديدة

سجلت الشركة مبيعات جديدة بقيمة ٣٦٫٣ مليار جنيه، بزيادة ١١٫٢٪ مقارنة بنفس الفترة من ٢٠٢٤. مشروع "سراي" بمساحة ٥٫٥ مليون متر مربع قرب العاصمة الإدارية الجديدة، ساهم بنسبة ٥٤٫٤٪ من المبيعات الجديدة بإجمالي ١٩٫٨ مليار جنيه، في حين مشروع "تاج سيتي" بمساحة ٣٫٦ مليون متر مربع في ضواحي القاهرة الشرقية، حقق ١٦٫٩٪ من المبيعات الجديدة بإجمالي ٦٫١ مليار جنيه

تفاصيل الربع الثالث

سجلت مدينة مصر صافي ربح ١٫١ مليار جنيه، بانخفاض ٣٠٫٩٪ على أساس سنوي، نتيجة التراجع بعد ذروة الطلب في ٢٠٢٤. الإيرادات نزلت ١٢٫٥٪ على أساس سنوي ل ٢٫٦ مليار جنيه، مقارنة بـ ٢٫٩٧ مليار جنيه في الربع الثالث من ٢٠٢٤. المبيعات الجديدة للربع ارتفعت ٢٧٫٥٪ لتصل إلى ١٥٫١ مليار جنيه، مقابل ١١٫٨ مليار جنيه في نفس الفترة من السنة إللي فاتت

أهم انجازات ٢٠٢٥

أطلقت الشركة مشروع "تلالا" في مدينة هليوبوليس الجديدة، باستثمارات متوقعة ٩٠ مليار جنيه ومبيعات متوقعة ٢٠٢ مليار جنيه، ومشروع "إلم تري بارك" السكني الجديد باستثمارات ١١ مليار جنيه ومن المتوقع أن يحقق مبيعات حوالى ٢٠ مليار جنيه. إلى جانب التقدم المستمر في مشاريع "تاج سيتي"، "سراي"، و"ذا بترفلاي"، المشاريع دي وسعت خط إيرادات مدينة مصر في المستقبل

بنهاية التسع شهور الأولى من ٢٠٢٥، إجمالي أراضي الشركة وصل ل ١٢٫٨ مليون متر مربع، منها ٤٫٤ مليون متر مربع أراضي متعددة الاستخدامات لسة متمش اطلاقها،وده بيوضح قدرة مدينة مصر على خلق قيمة طويلة الأجل للمساهمين، حسب ما قاله الرئيس التنفيذي للشركة امبارح

أعلنت راميدا عن صافي أرباح قدره ٢٨١ مليون جنيه خلال التسع شهور المنتهية في سبتمبر ٢٠٢٥، بزيادة ١٥٫١٪ على أساس سنوي، بدعم من الأداء التشغيلي القوي، إعادة تسعير المنتجات، وتعافي حجم المبيعات

محركات الإيرادات

وصلت الإيرادات الإجمالية للتسع شهور الأولى من ٢٠٢٥ ل ٢٫٩٦٤ مليار جنيه، بزيادة ٦٦٫١٪ مقارنة بنفس الفترة من ٢٠٢٤. النمو ده جه نتيجة التأثير الكامل لزيادة الأسعار المعتمدة بين ٤٠٪ و٥٠٪ على كامل المحفظة بتاعت الشركة، إلى جانب زيادة كبيرة في حجم المبيعات. كل من التسعير والحجم ساهم في النمو ده، بعد ما ارتفع متوسط سعر بيع الوحدة الخاصة من ٥٨ جنيه في الربع الثالث من ٢٠٢٤ إلى ٧٥ جنيه في الربع الثالث من ٢٠٢٥، كمان ارتفع إجمالي الوحدات المباعة (باستثناء التصنيع بالتعاقد) بنسبة ٥٩٪ على أساس سنوي ليصل إلى ٥٣٫٦ مليون وحدة

أداء الصادرات

إيرادات الصادرات خلال  التسع شهور الأولى من ٢٠٢٥ وصلت لحوالي ١٦٩ مليون جنيه، بزيادة ٢٢٪ على أساس سنوي. الأسواق الأكثر مساهمة كانت السودان بنسبة ٣٦٪، اليمن ٢٣٪، وليبيا ١٧٪، بدعم من تحسن السيولة الإقليمية، استقرار مسارات اللوجستيات، وتعزيز الحضور في الأسواق عالية الطلب زي العراق وليبيا

ملخص الربع الثالث

في الربع الثالث من ٢٠٢٥، وصل صافي الأرباح ل ٩٦ مليون جنيه، بانخفاض ٢٠٫٧٪ على أساس سنوي، وده يرجع بشكل أساسي ل زيادة حادة بنسبة ١٠٧٪ في التكاليف المالية المرتبطة ببناء المخزون الاستراتيجي من المواد الخام وتمويل الاستحواذات الأخيرة على الجزيئات. وصلت الإيرادات للربع ١٫١٣٥ مليار جنيه، بزيادة ٤٨٫٧٪ مقارنة بالربع الثالث من ٢٠٢٤، مع ارتفاع مبيعات المناقصات بنسبة ٣٩٠٪ على أساس سنوي لتصل إلى ٢٤٢٫٥ مليون جنيه، وزيادة مبيعات القطاع الخاص بنسبة ٢١٪ لتصل إلى ٧٥٨٫٩ مليون جنيه

التطلعات المستقبلية

قال الرئيس التنفيذي لشركة راميدا عمرو مرسي امبارح: "ندخل الربع الأخير من ٢٠٢٥ بزخم قوي — وهو تاريخياً أفضل فترات الأداء لدينا — بدعم من استمرار نشاط المناقصات، وزيادة إنتاج المنتجات الجديدة في مجال الجهاز العصبي المركزي وإدارة الألم، وتعافي قنوات القطاع الخاص مع تراجع العوائق التنظيمية. ومع هذه العوامل الداعمة وتركيزنا المنضبط على المجالات العلاجية عالية القيمة والاستخدام المتكرر، نظل واثقين من قدرة راميدا على الحفاظ على النمو، وتعزيز الربحية، وتقديم قيمة مستدامة لجميع الأطراف المعنية"

في مايو، أشارت الشركة أنها بتستهدف إيرادات كاملة ل ٢٠٢٥ تتراوح بين ٤٫٢ و٤٫٥ مليار جنيه، وأكدت الإدارة امبارح أن قوة خط الإنتاج الحالي بتحطها في وضع جيد لتحقيق الهدف ده

خلصنا جولتنا في السوق النهارده

استنوا التحديثات الجديدة بكرة