صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: كابو أعلنت عن توسع كبير في الإنتاج، مصر للألومنيوم أطلقت خط أسلاك جديد، و الحكومة بتخطط حوافز ضريبية للشركات اللي هتدخل البورصة

مؤشر إي جي إكس ٣٠ زاد بنسبة ٠٫٦٣٪ وقفَل عند ٤١٬٧٦٢ نقطة، مؤشر إي جي إكس ٧٠ زاد بنسبة ٢٫٦٥٪ وقفَل عند ١٢٬٧٩٤ نقطة، ومؤشر إي جي إكس ١٠٠ ارتفع بنسبة ٢٫٠٥٪ وقفَل عند ١٦٬٩٢٥ نقطة

قيمة التداول وصلت لـ٧ مليار جنيه، من خلال ١٥٠٬٧٣٦ عملية على حوالي ٣٬٩١٠٬٩٣٣٬٠٧٩ سهم

المستثمرين المحليين كانوا الوحيدين اللي سجلوا صافي بيع

أبرز الأسهم الكسبانة في السوق كله: مجموعة عامر جروب القابضة (+١٩٫٥٤٪)، العربية للخزف - سيراميكا ريماس (+١٢٫٨٤٪)، وارابيا للاستثمار والتنمية (+١٠٫١٩٪)

أما الخسرانة: العربية لمنتجات الالبان – باندا (-٥٫٥٣٪)، نهر الخير للتنمية والأستثمار الزراعى والخدمات البيئية (-٥٫٢٦٪)، ومصر للأسمنت (-٣٫٤٪)

بالنسبة لمؤشر إي جي إكس ٣٠: أبرز الكسبانة كانت بلتون القابضة (+٦٫٩٪)، بالم هيلز للتعمير (+٦٫٤٪)، وأوراسكوم كونستراكشون (+٣٫٨٪)

أما الخسرانة: مصر للأسمنت (-٣٫٤٪)، مصرف أبوظبي الإسلامي (-٢٫٧٪)، وچي بي كورب (-١٫٠٪)

:إحصائيات مهمة تانية

سعر جرام الدهب عيار ٢٤ وصل لـ٦٬٤٣٧ جنيه، مرتفع يوميًا بنسبة ٠٫٢٧٪ ومرتفع شهريًا بنسبة ٪٥٫٢٧

الدولار وصل لـ٤٧٫٤٥ جنيه في البنك الأهلي المصري

١- شركة النصر للملابس والمنسوجات (كابو) بتنفذ توسعات كبيرة في مصانعها بالعامرية والحضرة، وده هيزود عدد خطوط الإنتاج من ٤١ لـ٧٨، في إطار سعيها لتعزيز الصادرات للأسواق الإقليمية والدولية. (اقرا أكتر في قسم نظرة معمقة)

٢- شركة مصر للألومنيوم بدأت تشغيل خط جديد في نجع حمادي قيمته ١٧٫٥ مليون دولار بطاقة ٥٠٠٠ طن شهريًا من أسلاك الألومنيوم بالتعاون مع شركة بروبيرزي الإيطالية. المشروع هيساهم في تنويع المنتجات، رفع القيمة المضافة، وتعزيز حضور الشركة في السوق المحلي والدولي. سعر سهم الشركة ارتفع ٧٨٪ من بداية السنة

٣- مجموعة الجارحي رفعت حصتها في المطورون العرب القابضة لـ ٤٫٦٣٪ بعد شراء ٥٠٠ مليون سهم بقيمة ١٢٤٫١ مليون جنيه. إجمالي حصص الأطراف المرتبطة وصل ١٩٫٤٪ بعد موافقة الشركة على طرح حقوق اكتتاب مليار جنيه. شركة المطورون العرب أنهت امبارح على ارتفاع ٤٪ بعد الخبر، مستمرة في موجة صعودية بعد ما سجل سهمها ارتفاع حوالي ٤٥٫٧٦٪ خلال الشهر اللي فات. وبشكل عام، سعر السهم ارتفع حوالي ٦٪ من بداية السنة

٤- وزارة المالية وهيئة الرقابة المالية بيدرسوا حوافز المفروض هتمنح الشركات اللي هتنزل البورصة إعفاء ضريبي ٣ سنين على دخل الطرح العام، مع إمكانية التمديد حسب النمو والأداء، حسب ما قال مصدر حكومي لـ إنتربريز. المقترحات كمان تشمل إعفاءات على مكاسب الشركات القابضة من بيع حصص في الشركات المصرية الفرعية والأسهم غير المدرجة. من المتوقع يتم تطبيق الحوافز دي خلال النص الأول من ٢٠٢٦، حسب ما كتبت الجريدة

١- احتياطيات مصر من النقد الأجنبي وصلت لمستوى قياسي ٥٠٫٢ مليار دولار بنهاية نوفمبر، بزيادة ١٤٥ مليون دولار عن أكتوبر، حسب بيانات البنك المركزي. النمو المستمر في الاحتياطيات مدعوم بارتفاع إيرادات الصادرات، وزيادة دخل السياحة، وتحسن تحويلات المصريين العاملين  في الخارج

٢-  مصر ناوية تطرح مناقصة دولية على شركات أجنبية لتوريد حوالي ١٠٠ شحنة غاز مسال خلال السنة الجاية لتلبية احتياجات السوق المحلي، حسب ما قال مسؤول حكومي لـ"الشرق". متوقع يتم طرح المناقصة في مارس والتوريد يبدأ في أبريل، مع تحديد حد أقصى متوسط لسعر الشحنة ٥٤ مليون دولار. المسؤول قال إن مصر ناوية تكمل استيراد الغاز المسال لحد ٢٠٢٩–٢٠٣٠ لسد العجز الناتج عن تراجع الإنتاج المحلي، اللي وصل لـ٤٫٢ مليار قدم مكعب يومياً، في حين الطلب اليومي حوالي ٦٫٢ مليار قدم وبيزيد في الصيف لحوالي ٧٫٢ مليار قدم

شركة النصر للملابس والمنسوجات - كابو، شغالة على خطة توسع وتحديث كبيرة لمصانعها في العامرية والحضرة. بعد ما تخلص الخطة، الطاقة الإنتاجية هتتجاوز ٨٥ ألف قطعة يوميًا، وعدد خطوط الإنتاج هيرتفع من ٤١ ل ٧٨ خط

عمليات متطورة وخطوط إنتاج جديدة

الخطة بتشمل تطوير غرف القص، إضافة خطوط إنتاج جديدة، وتحسين كفاءة التشغيل لدعم التصنيع للغير والتصدير. في مصنع العامرية، هيتم تركيب مقص أوتوماتيك متطور، واللي هيزود قدرة القص اليومية لنحو ٣٠ ألف قطعة، وكمان خطوط الإنتاج هتزيد من ٤ لحد ١٢ خط بطاقة إنتاجية يومية حوالي ١٠ آلاف قطعة

أما في مصنع الحضرة، خطوط الإنتاج هترتفع من ٣٧ لحد ٦٦، واللي هيخلي الطاقة الإنتاجية اليومية تزيد من ٤٠ ألف قطعة لحوالي ٧٥ ألف قطعة حسب نوع المنتج والخط

شراكات دولية بتدعم التوسع

التوسعات حصلت من خلال شراكات مع شركات من تركيا وإيطاليا والصين، لدعم استراتيجية كابو في رفع كفاءة المصانع، زيادة الطاقة الإنتاجية، وتوسيع الصادرات للأسواق الخليجية والأوروبية

صفقة جديدة مع ياسين تيكستيل

في أكتوبر، كابو وقعت اتفاقية مع ياسين تيكستيل التركية لتوريد منتجات ضمن خطة التوسع والتصدير. المرحلة الأولى من التصنيع بدأت يوم ٢٥ أكتوبر، والمبيعات المتوقعة حوالي ٦٠٠ ألف دولار، مع خطة سنوية لزيادة المبيعات لـ٢ مليون دولار

أداء مالي يعكس تحديات

في نوفمبر، أظهرت النتائج المجمعة لكابو للسنة المالية ٢٠٢٤–٢٠٢٥ تراجع بنسبة ٢٦٪ في صافي الأرباح، ووصلت لـ١٥٤٫٢ مليون جنيه، في حين ارتفعت المبيعات الإجمالية لنحو ١٫١ مليار جنيه مقابل ٩٧٥٫٩٦ مليون جنيه في السنة المالية اللي قبلها

رغم تراجع الأرباح، سعر سهم الشركة ارتفع بنحو ٩٨٪ من بداية السنة

خلصنا جولتنا في السوق النهارده

استنوا التحديثات الجديدة بكرة