صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: تراجعت أرباح إعمار مصر ومصر الجديدة للإسكان والتعمير، لكن في المقابل حققت مصر للأسمنت – قنا، وشركة العربية للأسمنت، وغيرهم نتائج كويسة.

مؤشر إي جي إكس ٣٠ ارتفع بنسبة ٠٫٤٥٪ وقفَل عند ٣٩٬٩٠٢ نقطة، مؤشر إي جي إكس ٧٠ نزل بنسبة ١٫٣٧٪ ووصل لـ ١٢٬٢١٢ نقطة، ومؤشر إي جي إكس ١٠٠ كمان نزل بنسبة ٠٫٩٠٪ وقفَل عند ١٦٬٢٠٠ نقطة

قيمة التداول وصلت لـ ٧٫٦ مليار جنيه، من خلال ١٥٢٬٧٦٢ عملية على حوالي ٤٬٢٥٦٬٨٧٥٬٣٦٥ سهم

المستثمرين المحليين كانوا الوحيدين اللي سجلوا صافي شراء

أبرز الأسهم الكسبانة في السوق كله: المطورون العرب القابضة (+١٨٫٦٤٪)، القلعة للاستثمارات المالية (+١٢٫٧٦٪)، والعبور للاستثمار العقاري (+٩٫٤٢٪)

أما الخسرانة: ديجيتايز للاستثمار والتقنية (-٨٫١٦٪)، المجموعة المصرية العقارية (-٧٫١٤٪)، وماكرو جروب للمستحضرات الطبية (-٦٫٦٧٪)

بالنسبة لمؤشر إي جي إكس ٣٠: أبرز الكسبانة كانت القلعة للاستثمارات المالية (+١٢٫٨٪)، أوراسكوم للتنمية (+٣٫٦٪)، والبنك التجاري الدولي (+٣٫٢٪)

أما الخسرانة: المصرية للاتصالات (-٣٫٥٪)، راية القابضة (-٢٫٩٪)، وجهينة (-٢٫٨٪)

إحصائيات مهمة تانية

سعر جرام الدهب عيار ٢٤ وصل لـ ٦٬٣٧٢ جنيه، مرتفع يوميًا بنسبة ٠٫١٢٪ ومنخفض شهريًا بنسبة ٪٠٫٠٢

الدولار وصل لـ ٤٧٫٧٧ جنيه في البنك الأهلي المصري

- إعمار مصر سجلت تراجع حاد في صافي أرباح أول تسع شهور من ٢٠٢٥ بنسبة ٥٨٫٥٪ على أساس سنوي، بعد ما نزلت أرباحها لـ ٤٫٢٩ مليار جنيه. ورغم الهبوط الكبير في الأرباح، إيرادات الشركة زادت ووصلت لـ ١٤٫٥٨ مليار جنيه. (اقرأ أكتر في قسم نظرة معمقة)

٢- أعلنت شركة مصر الجديدة للإسكان والتعمير عن تحقيق صافي ربح بلغ ١٫٠٦ مليار جنيه خلال أول تسع شهور من ٢٠٢٥، بتراجع ٣٩٪ مقارنة بـ نفس الفترة من ٢٠٢٤. في الوقت نفسه، ارتفعت الإيرادات ل ١٫٢٧ مليار جنيه. (اقرأ أكتر في قسم نظرة معمقة)

٣- مصر للأسمنت – قنا حققت نقلة ضخمة في أول ٩ شهور من ٢٠٢٥، بعدما صافي الربح قفز لـ١٫٧١ مليار جنيه بدل حوالي ٥١ مليون جنيه في نفس الفترة من ٢٠٢٤. كمان المبيعات زادت بشكل واضح ووصلت لـ٦٫٧٦ مليار جنيه، مقابل ٤٫١ مليار جنيه في نفس الفترة من السنة اللي فاتت. أسهم الشركة ارتفعت أكتر من ٥٤٠٪ من بداية ٢٠٢٥

٤- شركة العربية للأسمنت سجلت قفزة ضخمة في أرباحها خلال أول تسعة شهور من ٢٠٢٥، بعدما صافي الربح زاد بنسبة ٢٧٩٪ ووصل لـ٢٫٥٢ مليار جنيه. كمان الإيرادات ارتفعت لـ٨٫٨ مليار جنيه، مقارنة بـ٦٫٣٨ مليار جنيه في نفس الفترة من ٢٠٢٤. وسهم الشركة طالع ٢٠٠٪ من بداية ٢٠٢٥

٥- شركة أسمنت سيناء سجلت انخفاض ٤٤٪ في صافي الأرباح خلال أول ٩ شهور من ٢٠٢٥، ووصلت الأرباح لـ١٫٥٣ مليار جنيه. رغم تراجع الأرباح، المبيعات عليت ووصلت لـ٦٫٦٧ مليار جنيه مقابل ٤٫٤٤ مليار جنيه السنة اللي فاتت، بس ارتفاع تكاليف الإنتاج قلل من الأرباح الفعلية. وسهم الشركة طالع حوالي ١٢٠٪ من بداية السنة

٦- البنك المصري لتنمية الصادرات سجّل صافي ربح ٤٫٣١ مليار جنيه في أول تسع شهور من ٢٠٢٥، بزيادة ٩٫١٪ عن نفس الفترة من السنة اللي فاتت. كمان صافي الدخل من العائد ارتفع ووصل لـ٧٫٢٥ مليار جنيه مقابل ٦٫٢٨ مليار جنيه في ٢٠٢٤. وسعر سهم البنك طالع حوالي ٢١٪ من بداية السنة

:أخبار غير متعلقة بالأرباح

١- السويدي للأسمنت زودت حصتها في القلعة للاستثمارات المالية، وبقت تمتلك ٨٫٧٣٪ من الشركة بدل ٤٫٩٧٪، بعد ما اشترت ١٥٩ مليون سهم في صفقة قيمتها حوالي ٩٣ مليون جنيه. سعر الشراء كان متوسطه ٠٫٥٨٥ جنيه للسهم. سعر سهم القلعة ارتفع أكتر من ٤٥٪ من بداية السنة

٢- شركة أسيك للتعدين وقفت مفاوضاتها مع مستثمر أجنبي بخصوص بيع شركتها التابعة جلاس روك للعزل بعد ما الطرفين ما عرفوش يتوصلوا لاتفاق. الشركة كانت وقعت اتفاقية في نهاية سبتمبر خلت المستثمر يعمل دراسة فنية ومالية لجلاس روك قبل إتخاذ قرار نهائي. سهم أسيك ارتفع ٤٤٪ من بداية ٢٠٢٥

٣- الرئيس التنفيذي لمجموعة طلعت مصطفى أعلن خلال اجتماع مع وزيرة البيئة منال عوض عن خطة لمشروع سياحي صديق للبيئة في شرم الشيخ. المشروع، اللي بيشتغل عليه مستشارين دوليين، هدفه حماية الشعب المرجانية والحفاظ على الموارد الطبيعية على ساحل البحر الأحمر. سعر سهم الشركة ارتفع حوالي ٢٧٪ من بداية السنة

٢٧ نوفمبر ٢٠٢٥ 

مصر للأسمنت – تاريخ صرف توزيعات الأرباح بقيمة ٠٫٥ جنيه للسهم، وتاريخ الاستحقاق كان يونيو ٢٣

راميدا – تاريخ صرف توزيعات الأرباح بقيمة ٠٫٠٥٣ جنيه للسهم، وتاريخ الإستحقاق كان هو ٧ يوليو. هتقوم الشركة برضو بتوزيع ٠٫٣٢٣ سهم مجاني لكل سهم في ٣ ديسمبر، وتاريخ الاستحقاق ٢ ديسمبر

١- شركة إيني الإيطالية للطاقة هتستثمر ٨ مليار دولار خلال الخمس سنين الجاية لتطوير حقول النفط والغاز الحالية وتنفيذ مشاريع استكشاف جديدة، حسب ما قال الرئيس التنفيذي للشركة في اجتماع مع الرئيس عبد الفتاح السيسي. في أول الشهر، الشركة أعلنت عن تمديد امتيازاتها في خليج السويس ودلتا النيل لحد ٢٠٤٠ بموجب اتفاق مع الهيئة المصرية العامة للبترول. ده كله في ظل إن الطلب اليومي على الغاز في مصر حوالى ٦.٢ مليار قدم مكعب، مقارنة بالإنتاج اللي تقريبًا ٤.٢ مليار قدم مكعب

٢- أعلن الفريق أسامة ربيع، رئيس هيئة قناة السويس، امبارح عن توقيع اتفاقية مع شركة ميرسك العالمية للخطوط الملاحية تسمح لأسطول الشركة بالعودة الكاملة للعبور من القناة بعد أكتر من سنتين من الاضطرابات. وأضاف إن في مفاوضات مستمرة مع شركات ملاحة عالمية تانية، ويتوقع إن القناة هتحقق إيرادات حوالى ٤٫١ مليار دولار السنة دي، مع تحسن أكبر متوقع في ٢٠٢٦

شركة إعمار مصر سجلت تراجع حاد في صافي الأرباح لأول تسع شهور من ٢٠٢٥ بنسبة ٥٨٫٥٪، بعد ما نزلت أرباحها لـ ٤٫٢٩ مليار جنيه مقابل ١٠٫٣٤ مليار جنيه خلال نفس الفترة من ٢٠٢٤. ورغم الهبوط الكبير في الأرباح، إيرادات الشركة ارتفعت ووصلت لـ ١٤٫٥٨ مليار جنيه مقارنة بـ ١٣٫٢٦ مليار جنيه في نفس الفترة

سعر سهم الشركة ارتفع بنسبة ١٩٫٧١٪ من بداية السنة

تحركات مهمة للشركة

في بداية الشهر، أنهت إعمار مصر اتفاق مع شركات تابعة لمجموعة دلة البركة السعودية لتطوير مشروع متكامل على مساحة ٣٨٠ فدان في غرب القاهرة، يشمل مناطق سكنية وتجارية وإدارية. حجم الاستثمارات المخطط له حوالي ٧٨ مليار جنيه، مع عوائد متوقعة بنحو ١١٧ مليار جنيه. وبحسب مصادر تحدثت لـ"الشرق"، دلة البركة هتساهم بالأرض، وإعمار مصر هتقود التطوير والتشغيل، وتستحوذ على ٦٧٪ من عوائد المشروع

جزء من توسعاتها

في سبتمبر، أعلنت الشركة عن مشروع ماراسي البحر الأحمر، وجهة سياحية متكاملة باستثمارات ٩٠٠ مليار جنيه بالتعاون مع شركة سيتي ستارز السعودية. المشروع هيضم ١٢ فندق فاخر، آلاف الوحدات السكنية، أكثر من ٥٠٠ منفذ تجاري ومطاعم، مارينا، شواطئ خاصة، مدارس ومستشفيات. إيمار وسيتي ستارز كل واحدة منهما تمتلك ٥٠٪ من المشروع، والمتوقع يولد حوالي ٢٠٠ مليون دولار سنويًا ويخلق حتى ١٧٠٬٠٠٠ فرصة عمل أثناء البناء

المستقبل

إعمار مصر بتُعتبر واحدة من أكبر مطوري العقارات في مصر، بمحفظة مشاريع بتضم مراسي، سول، بيل ڤي، كايرو جيت، أب تاون كايرو، ميفيدا، وميفيدا جاردنز. إجمالي استثمارات الشركة في السوق المصري وصل لحوالي ١٫٩ تريليون جنيه، وبتخطط لمضاعفة الرقم ده خلال السنوات الجاية ضمن خطتها للنمو الطويل المدى، حسب تصريحات مؤسس إعمار محمد العبار

أعلنت شركة مصر الجديدة للإسكان والتعمير عن تحقيق صافي ربح بلغ ١٫٠٦ مليار جنيه خلال أول تسع شهور من ٢٠٢٥، بتراجع ٣٩٪ مقارنة بـ ١٫٧٤ مليار جنيه خلال نفس الفترة من ٢٠٢٤. ويعكس انخفاض الأرباح قرار الشركة بإعادة استثمار السيولة لتوسيع محفظة الأراضي وتمويل المشروعات الجارية

في الوقت نفسه، ارتفعت الإيرادات ل ١٫٢٧ مليار جنيه مقابل ٨٩٦٫١ مليون جنيه العام الماضي، مدفوعة بمبيعات الأراضي والعقارات، والدخل الأدنى المضمون من سوديك. 

وصلت قيمة سهم الشركة ل ارتفاع ٢١٫٤٦٪ من بداية ٢٠٢٥

أهم الإنجازات التشغيلية خلال الفترة المالية

إطلاق مشروع جادينيا المرحلة الأولى على مساحة ٣٠٠ فدان، متوقع أن تحقق مبيعات بحوالي ٤ مليارات جنيه

استرداد ٩٦٫٣٣ مليون جنيه من شركة معاوضة المعادي من خلال تسوية ديون بأرض

شراء ٢٢٤ وحدة سكنية في مدينة هليوبوليس الجديدة لتوسيع المحفظة العقارية وزيادة الإيرادات المستقبلية.

زيادة رأس المال من ٣٣٣٫٧٧ مليون جنيه إلى ١٫٠٠١ مليار جنيه عن طريق إصدار أسهم مجانية بنسبة ٢:١

الخطة المستقبلية

أوضحت الإدارة أنها تراجع عقد أرض المنصورة لضمان قيمة دنيا أعلى من سعر الشراء بالإضافة إلى ٣ مليارات جنيه إيرادات. كما حصلت الشركة على ١ مليار جنيه من مدينة مصر كدفعة دنيا مضمونة لمشروع تطوير ٤٩١ فدانًا. وأقرت مصر الجديدة المرحلة الأولى من المنطقة التجارية لشركة سوديك في هليوبوليس الجديدة، بالتنسيق مع شركة واندر لتقديم خدمات التسويق والترفيه ضمن المشروع

خلصنا جولتنا في السوق النهارده

استنوا التحديثات الجديدة بكرة