صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: إعمار مصر تكشف عن مشروع بقيمة ٧٨ مليار جنيه، ومدينة مصر تسجل مبيعات ٣٦٫٣ مليار جنيه، و ديار القطرية تعلن عن مشروع ضخم بقيمة ٢٩٫٧ مليار دولار في مصر.

مؤشر إي جي إكس ٣٠ زاد بنسبة ٠٫١٧٪ وقفَل عند ٣٩١٣٢ نقطة، مؤشر إي جي إكس ٧٠ نزل بنسبة ٠٫٩٧٪ وقفَل عند ١٢٠٧٨ نقطة، ومؤشر إي جي إكس ١٠٠ وقع هو كمان بنسبة ٠٫٨٢٪ وقفَل عند ١٥٩٢٨ نقطة

قيمة التداول وصلت لـ٦٫٣ مليار جنيه، من خلال ١٤٨٬٠٥١ عملية على حوالي ١٫٥٠٩ مليار سهم

المستثمرين الأجانب كانوا الوحيدين اللي سجلوا صافي شراء

أبرز الأسهم الكسبانة في السوق كله: جوجرين للاستثمار الزراعي (٪١١+)، ماكرو جروب (٪٨٫٣٨+)، والقاهرة الوطنية للاستثمار (٪٧٫٨٥+)

أما الخسرانة: مطاحن شرق الدلتا (-٪٨٫٤١)، جدوى للتنمية الصناعية (-٪٥٫٣١)، والنيل للأدوية والصناعات الكيماوية (-٪٥٫٠٧)

بالنسبة لمؤشر إي جي إكس ٣٠: أبرز الكسبانة كانت مجموعة طلعت مصطفى (٪٥٫٧+)، بالم هيلز للتعمير (٪١٫٨+)، ومصرف أبوظبي الإسلامي (٪١٫١+)

أما الخسرانة: العربية للأسمنت (-٪٢٫٩)، بلتون القابضة (-٪٢٫٩)، وأبو قير للأسمدة (-٪٢٫٢)

إحصائيات مهمة تانية

سعر جرام الدهب عيار ٢٤ وصل لـ٦١٢٠ جنيه، مرتفع بنسبة ٠٫٠٤٪ يوميًا وبنسبة ١٫٧٨٪ شهريًا

الدولار وصل لـ٤٧٫٣٦ جنيه في البنك الأهلي المصري

١- إعمار مصر ومجموعة دلة البركة السعودية هيبدأوا تنفيذ مشروع جديد متعدّد الاستخدامات في غرب القاهرة باستثمارات حوالي ٧٨ مليار جنيه، والعائدات المتوقعة بتوصل لـ١١٧ مليار جنيه. مصادر قالت لـ"الشرق" إن دلة البركة هتقدّم الأرض، وإعمار مصر هتتولى التطوير والإدارة مقابل ٦٧٪ من العائدات، وسهم الشركة طالع ٣٢٫٩٤٪ من بداية السنة. (اقرا أكتر في قسم نظرة معمقة)

٢- مدينة مصر للإسكان والتعمير أعلنت إن مبيعاتها الجديدة وصلت لـ٣٦٫٣ مليار جنيه خلال أول تسعة شهور من ٢٠٢٥. تسليم الوحدات زاد بنسبة ١١٢٪ على أساس سنوي، وتم تسجيل حجوزات بأكثر من ٢ مليار جنيه خلال الفترة — وذكرت الشركة إن الأرقام دي بتعكس طلبًا قويًا بعد إطلاق عدة مشاريع ودخول شراكات جديدة. سهم الشركة ارتفع بنسبة ١٢٫٦٪ من بداية السنة

٣-  مشارق للاستثمار العقاري، التابعة لشركة بايونيرز بروبرتيز للتنمية العمرانية، حصلت على قرض مُجمّع بقيمة مليار جنيه بقيادة البنك الأهلي المصري لتمويل المرحلة الأولى من مشروعها التجاري «زاج إيست» في القاهرة الجديدة. شارك في التمويل بنك التنمية الصناعية وبنك أبوظبي التجاري بثلاثمائة مليون جنيه لكل بنك، والقرض مدته ٨ سنين وبيشمل فترة توافر ٣٠ شهر وفترة سماح ٣٦ شهر. سهم بايونيرز بروبرتيز زاد بنسبة ٣٣٫٦٪ من بداية ٢٠٢٥

٤- البنك التجاري الدولي والبنك الأهلي المصري وقّعوا اتفاق تمويل مع شركة بيوراديف — اللي بتضم الشركة القابضة للصناعات الكيماوية وشركة مصر لصناعة الكيماويات وشركة كادينس للطاقة من القطاع الخاص — لإنشاء أول مصنع لإنتاج أقراص وحبيبات الكلور في مصر وإفريقيا والشرق الأوسط، باستثمارات حوالي ٣٩ مليون دولار. المصنع هيُقام داخل شركة مصر لصناعة الكيماويات، وهيُنتج ١٠ آلاف طن من أقراص وحبيبات الكلور و١٠ آلاف طن من حمض السيانوريك، اللي بيستخدموا في تعقيم ومعالجة المياه وحمامات السباحة وكمان في صناعات الورق والمنسوجات. كمان هيُنتج ١٨ ألف طن من سماد كبريتات الأمونيوم اللامائية لدعم الإنتاج الزراعي في مصر

٥- شركة جو جرين للاستثمار الزراعي والتنمية سجلت تراجع في صافي أرباحها بنسبة ٣٨.٢٪ خلال أول تسع شهور من ٢٠٢٥، وحققت ٢٨.٧٥ مليون جنيه مقابل ٤٦.٥٢ مليون جنيه في نفس الفترة من السنة اللي قبلها. وكمان الإيرادات نزلت لـ٦٢.٢٦ مليون جنيه بدل ٧١.٩ مليون جنيه في نفس الفترة من السنة اللي فاتت

٦- شركة مرسيليا المصرية الخليجية للاستثمار العقاري رجعت للربحية خلال أول تسع شهور من ٢٠٢٥، وسجّلت صافي ربح ٧٢.٠٢ مليون جنيه مقابل خسارة ٢١.٧٥ مليون جنيه في نفس الفترة من السنة اللي فاتت. الإيرادات المجمعة كمان قفزت لـ٦٥٥.٥٦ مليون جنيه بدل ١٦٨.٠٩ مليون جنيه خلال نفس الفترة من ٢٠٢٤، في مؤشر على تحسّن قوي في الأداء التشغيلي. سهم الشركة ارتفع بنسبة ١٥.٣٪ من بداية السنة

٦ نوفمبر ٢٠٢٥ (النهارده)

مطاحن ومخابز شمال القاهرة – تاريخ صرف توزيعات الأرباح بقيمة ٣ جنيه للسهم، وتاريخ الاستحقاق كان يوم الأحد ٣ نوفمبر

شركة مطاحن مصر الوسطى – تاريخ صرف توزيعات الأرباح بقيمة ٥ جنيه للسهم، وتاريخ الاستحقاق كان يوم الأحد ٣ نوفمبر

مصر لصناعة الكيماويات – تاريخ صرف توزيعات الأرباح بقيمة ٢ جنيه للسهم، وتاريخ الاستحقاق كان يوم الأحد ٣ نوفمبر

الإسكندرية للأدوية والصناعات الكيماوية – تاريخ صرف توزيعات الأرباح بقيمة ٦٢٫٩٥ جنيه للسهم، وتاريخ الاستحقاق كان يوم الأحد ٣ نوفمبر

٩ نوفمبر ٢٠٢٥

المنصورة للدواجن – تاريخ صرف الأسهم المجانية بمعدل ٠٫٥٢ سهم مجاني لكل سهم أصلي، وتاريخ الاستحقاق كان امبارح

جهينة للصناعات الغذائية – تاريخ صرف الأسهم المجانية بمعدل ٠٫٢٥ سهم مجاني لكل سهم أصلي، وتاريخ الاستحقاق كان امبارح

دايس للملابس الجاهزة – تاريخ صرف الأسهم المجانية بمعدل ٠٫٥ سهم مجاني لكل سهم أصلي، وتاريخ الاستحقاق كان امبارح

مطاحن شرق الدلتا – تاريخ صرف توزيعات الأرباح بقيمة ٢٣ جنيه للسهم، وتاريخ الاستحقاق كان يوم الثلاثاء ٤ نوفمبر

 مطاحن ومخابز الإسكندرية – تاريخ الاستحقاق لتوزيعات الأرباح بقيمة ٠٫٧٥ جنيه للسهم، وسيتم الصرف يوم الأربعاء ١٢ نوفمبر

١- مصدر قال لرويترز إن شركة ديار، الذراع العقاري لـ جهاز قطر للاستثمار، هتستثمر ٢٩٫٧ مليار دولار في مشروع ضخم على الساحل الشمالي لمصر — في صفقة شبه مشروع رأس الحكمة الإماراتي. الاتفاق مع هيئة المجتمعات العمرانية الجديدة بيشمل دفعة نقدية بـ٣٫٥ مليار دولار أمريكي مقابل الأرض، واستثمار عيني بـ٢٦٫٢ مليار دولار أمريكي لتطوير المشروع. المصدر أضاف إن تنفيذ الاتفاق ده كان من العقبات الأساسية اللي أخّرت وصول مصر لتمويلات جديدة من صندوق النقد الدولي (ضمن قرضنا مع الصندوق البالغ ٨ مليار دولار)، واللي كانت مشروطة بضخ استثمارات خليجية كبيرة جديدة

٢-  مصدر حكومي قال لـ إنتربرايز إن الحكومة المصرية شغالة دلوقتي على حصر كل الأصول غير المستغلة والمصانع المتوقفة تمهيدًا لتوسيع برنامج الطروحات الحكومية. الحصر هيشمل الأراضي والمخازن والمصانع الخاسرة، والنية إنها تتطرح للمستثمرين بنظام حق الانتفاع أو المشاركة في الأرباح، في محاولة لتحسين أوضاع الشركات التابعة للدولة اللي بتعاني ماليًا

إعمار مصر وقّعت اتفاق مع مجموعة دلة البركة السعودية لإطلاق مشروع ضخم متعدّد الاستخدامات في غرب القاهرة. الشراكة دي بتضم شركتي سملا وعلم الروم للتنمية العمرانية التابعين لدلة البركة، بإجمالي استثمارات متوقعة حوالي ٧٨ مليار جنيه، والعائدات المنتظرة بتوصل تقريبًا لـ١١٧ مليار جنيه

المشروع الجديد هيقام على مساحة ٣٨٠ فدان في منطقة القطامية في القاهرة الجديدة، وهيضم مناطق سكنية وإدارية وتجارية

مصادر مطّلعة قالت في تصريحات لـ"الشرق" نهاية الشهر اللي فات إن دلة البركة هتقدّم الأرض الخاصة بالمشروع، في حين إعمار مصر هتتولّى عمليات التطوير والإدارة مقابل ٦٧٪ من العائدات

الاتفاق ده بييجي ضمن استراتيجية إعمار مصر للتوسّع في السوق المحلي من خلال عدد من المشاريع الكبرى. في سبتمبر اللي فات، الشركة أعلنت عن تطوير مشروع مراسي البحر الأحمر باستثمارات حوالي ٩٠٠ مليار جنيه بالشراكة مع شركة سيتي ستارز المملوكة للسعودية. المشروع الساحلي هيضم ١٢ فندق، آلاف الوحدات السكنية، أكتر من ٥٠٠ مطعم ومتجر، مرسى لليخوت، شواطئ خاصة، مدارس، ومستشفيات.

كل من إعمار وسيتي ستارز بيمتلكوا نسبة ٥٠٪ في المشروع، اللي من المتوقع يحقق حوالي ٢٠٠ مليون دولار إيرادات سنوية، ويوفّر ما يصل لـ١٧٠ ألف فرصة عمل أثناء فترة الإنشاء

إعمار مصر كانت أعلنت عن صافي ربح ٣٫٩١ مليار جنيه في النصف الأول من ٢٠٢٥، مقابل ٧٫٦٤ مليار جنيه في نفس الفترة من السنة اللي قبلها، في حين إن الإيرادات زادت ووصلت لـ٩٫٢٩ مليار جنيه مقابل ٥٫٦ مليار جنيه خلال النصف الأول من ٢٠٢٤

إعمار مصر بتُعتبر واحدة من أكبر مطوري العقارات في مصر، بمحفظة مشاريع بتضم مراسي، سول، بيل ڤي، كايرو جيت، أب تاون كايرو، ميفيدا، وميفيدا جاردنز. إجمالي استثمارات الشركة في السوق المصري وصل لحوالي ١٫٩ تريليون جنيه، وبتخطط لمضاعفة الرقم ده خلال السنوات الجاية ضمن خطتها للنمو الطويل المدى، حسب تصريحات مؤسس إعمار محمد العبار.

سهم الشركة زاد بنسبة ٣٢٫٩٤٪ من بداية ٢٠٢٥

خلصنا جولتنا في السوق النهارده

استنوا التحديثات الجديدة بكرة