صباح الخير، وأهلاً بيكم في "تيلدا لينس" — نظرتكم اليومية على حركة السوق والفلوس في مصر، في دقايق

النهارده: إيدچ القابضة تستحوذ على حصة في بساطة، القلعة تتحول للخسارة بسبب ضعف هوامش التكرير، أبوقير تحقق زيادة طفيفة في الأرباح، وإعمار مصر تجهز لمشروع ضخم في شرق القاهرة مع دلة البركة السعودية

مؤشر إي جي إكس ٣٠ ارتفع بنسبة ٠٫١٠٪ وقفَل عند ٣٨٢٦٧ نقطة، ومؤشر إي جي إكس ٧٠ زاد بنسبة ٠٫٠٥٪ وقفَل عند ١٢٠٨٥ نقطة، في حين إن مؤشر إي جي إكس ١٠٠ نزل بنسبة ٠٫٠٤٪ وقفَل عند ١٥٩٠٨ نقط

قيمة التداول وصلت لـ٦.١ مليار جنيه، من خلال ١١٦٬٨٨٣ عملية على حوالي ١.٥١٥ مليار سهم

المستثمرين الإقليميين كانوا الوحيدين اللي سجلوا صافي شراء

أبرز الأسهم الكسبانة في السوق كله: بنك قناة السويس (٪١٨٫١١+)، ماكرو جروب (٪١١٫٦٩+)، وجوجرين للاستثمار الزراعي (٪٧٫٥٦+)

أما الخسرانة: الحديد والصلب المصرية (-٪٥٫٠٠)، شركة كوبر للاستثمار التجارى و التطوير العقارى(-٪٤٫٧٦)، وشركة النصر للأعمال المدنية (-٪٤٫٤٤)

بالنسبة لمؤشر إي جي إكس ٣٠: أبرز الكسبانة كانت إي فاينانس (٪٣٫٢+)، كريدي أجريكول (٪٢٫٠+)، ومصرف أبو ظبي الإسلامي (٪١٫٣+).

أما الخسرانة: بلتون القابضة (-٪٣٫٦)، القلعة للاستثمارات المالية (-٪٢٫٧)، و إي إف جي القابضة (-٪٢٫٣).

إحصائيات مهمة تانية

سعر جرام الدهب عيار ٢٤ وصل لـ٦١١٨ جنيه، منخفض بنسبة ١٫١٣٪ يوميًا لكنه مرتفع بنسبة ٢٫٥٨٪ شهريًا

الدولار وصل لـ٤٧٫١٩ جنيه في البنك الأهلي المصريي

١- شركة إيدج القابضة للاستثمارات وقّعت اتفاق علشان تستحوذ على ٣٠٪ من شركة بساطة للتمويل متناهي الصغر عن طريق زيادة رأس المال. الشركة دي مملوكة لـ بساطة المالية القابضة، اللي هي مشروع مشترك بين شركة بي إنفستمنتس القابضة وشركة إم.إم جروب للصناعة والتجارة العالمية، والاتنين شركات مدرجة في البورصة المصرية. كمان إيدج القابضة هتتولى إدارة بساطة علشان توسّع نشاطها على مستوى الجمهورية وتقوّي خدماتها في التمويل الرقمي (اقرا أكتر في قسم نظرة معمقة)

٢- القلعة للاستثمارات المالية سجّلت خسارة صافية بعد حقوق الأقلية ٤٣ مليون جنيه في الربع الأول ٢٠٢٥، مقابل صافي ربح ٧٫٢ مليار جنيه في نفس الفترة من ٢٠٢٤، بسبب تراجع هوامش التكرير في الشركة المصرية لتكرير البترول اللي سجلت خسارة ١٫١ مليار جنيه بعد ما كانت محققة ربح ٢٫١ مليار جنيه السنة اللي فاتت. الشركات التابعة المدرجة في البورصة أدّت بشكل قوي، بعد ما شركة طاقة عربية حققت صافي ربح ١٣٦٫١ مليون جنيه بزيادة ٣٢٪ عن السنة اللي فاتت، وشركة أسيك للتعدين حققت صافي ربح ٣٨٫٦ مليون جنيه بدل خسارة ٢٥٫٧ مليون جنيه في نفس الفترة من ٢٠٢٤ (اقرا أكتر في قسم نظرة معمقة)

٣- شركة أبو قير للأسمدة حققت زيادة ٢٪  على أساس سنوي في صافي الأرباح ووصلت لـ١٫٣ مليار جنيه في أول ربع من السنة المالية ٢٠٢٥/٢٠٢٦، مع ارتفاع الإيرادات لـ٣٫٩١ مليار جنيه. الشركة قالت إن الزيادة دي جاية من استقرار إمدادات الغاز، وتحسّن أسعار التصدير، ورفع كفاءة التشغيل (اقرا أكتر في قسم نظرة معمقة)

٤- شركة إعمار مصر دخلت في مفاوضات مع شركة دلة البركة السعودية عشان يدرسوا شراكة جديدة لتطوير مشروع ضخم متعدد الاستخدامات في شرق القاهرة. المشروع هيكون على مساحة حوالي ٣٨٠ فدان، وبيتم بالتعاون مع شركتي سملا وعلم الروم للتنمية العمرانية التابعتين لدلة البركة، ومن المتوقع يحقق إيرادات بحوالي ٣.٤ مليار دولار، بحسب تصريحات مؤسس شركة إعمار محمد العبار ل إقتصاد الشرق. مصادر قريبة من الصفقة قالت إن دلة البركة هتقدّم الأرض، وإعمار مصر هتتولى عملية التطوير والإدارة مقابل ٦٧٪ من عائدات المشروع

٥- شركة سي أي كابيتال لإدارة الأصول، التابعة لمجموعة سي آي كابيتال القابضة، أعلنت عن فتح باب الاكتتاب في صندوقها الجديد للاستثمار في الذهب المتوافق مع الشريعة الإسلامية. الصندوق اللي اسمه "جولد مصر" بيستثمر في سبائك الذهب وبيقدّم عائد تراكمي يومي مع نظام سحب جوائز للمستثمرين. الاكتتاب بدأ النهارده وهيستمر لمدة تصل لشهرين، وشركة سي آي كابيتال للوساطة في الأوراق المالية هي الجهة المسؤولة عن تلقي الاكتتابات في المرحلة الأولى

٢ نوفمبر ٢٠٢٥ (النهارده)

شركة النيل للأدوية والصناعات الكيماوية – تاريخ صرف توزيعات الأرباح بقيمة ٢ جنيه للسهم، وتاريخ الاستحقاق كان ٢٨ أكتوبر

٣ نوفمبر ٢٠٢٥

شركة مطاحن ومخابز شمال القاهرة – تاريخ استحقاق توزيعات الأرباح بقيمة ٣ جنيه للسهم، وتاريخ الصرف يوم الخميس ٦ نوفمبر

شركة مطاحن مصر الوسطى – تاريخ استحقاق توزيعات الأرباح بقيمة ٥ جنيه للسهم، وتاريخ الصرف يوم الخميس ٦ نوفمبر

شركة مصر لصناعة الكيماويات – تاريخ استحقاق توزيعات الأرباح بقيمة ٢ جنيه للسهم، وتاريخ الصرف يوم الخميس ٦ نوفمبر

شركة الإسكندرية للأدوية والصناعات الكيماوية – تاريخ استحقاق توزيعات الأرباح بقيمة ٦٢٫٩٥ جنيه للسهم، وتاريخ الصرف يوم الخميس ٦ نوفمبر

٤ نوفمبر ٢٠٢٥ 

شركة مطاحن شرق الدلتا – تاريخ استحقاق توزيعات الأرباح بقيمة ٢٣ جنيهً للسهم، وتاريخ الصرف يوم الأحد ٩ نوفمبر

١- مصدرين حكوميين قالوا ل أنتربريز إن مجلس الوزراء بيجهّز لتوسيع برنامج الطروحات علشان يشمل خمسين شركة مملوكة للدولة في ١٤ قطاع بدل ٣٥ حاليًا، بهدف جذب استثمارات أكتر من القطاع الخاص عن طريق البورصة المصرية. الخطة الجديدة بتركّز على طرح حصص صغيرة في البورصة بدل عمليات البيع الكاملة، وده بهدف تنشيط السوق وزيادة السيولة. الجدير بالذكر إن الحكومة حققت حوالي ٤٨٪ من مستهدفها البالغ ١٢٫٢ مليار دولار في الفترة من مارس ٢٠٢٢ لحد يوليو ٢٠٢٥، وجمعت حوالي ٥٫٩ مليار دولار من بيع حصص في ١٩ شركة عن طريق طروحات مباشرة واكتتابات عامة

٢- وزارة الطاقة الإسرائيلية قالت في بيان نقلته فايننشال تايمز إن تل أبيب قررت تجميد اتفاق تصدير الغاز لمصر اللي قيمته ٣٥ مليار دولار، لحد ما يتم الاتفاق على تسعير عادل وضمان تلبية احتياجات السوق المحلي. مصدر مطلع قال للجريدة إن التأجيل سببه خلافات تجارية داخلية بين الشركاء في إسرائيل، مش توترات سياسية مع الحكومة المصرية. وأضاف المصدر إن وزير الطاقة الأمريكي كريس رايت لغى زيارته المقررة لإسرائيل بعد الضغوط اللي مارستها واشنطن علشان تدفع الصفقة لقدّام لصالح شركة شيفرون وشركائها في حقل ليفياثان

شركة إيدج القابضة للاستثمارات أعلنت إنها وقّعت اتفاق علشان تشتري ٣٠٪ من شركة بساطة للتمويل متناهي الصغر التابعة لـ بساطة المالية القابضة، وده من خلال زيادة في رأس المال. وبموجب الاتفاق ده، إيدج القابضة هتتولى إدارة بساطة بهدف التوسع في نشاطها على مستوى الجمهورية

الأطراف ما أعلنوش عن قيمة الصفقة أو عدد الأسهم الجديدة اللي هتتطرح

الهدف من الصفقة

الخطوة دي جاية علشان تساعد بساطة تنوّع منتجاتها، وتقوّي خدماتها في التمويل الرقمي، وتحسّن من نظم الحوكمة والإدارة، في إطار سعيها لتوسيع الوصول للخدمات المالية للمشروعات الصغيرة والمتوسطة وللشرائح محدودة الدخل. كمان الشركة ناوية تتعاون بشكل أكبر مع شركتها الشقيقة بساطة باي علشان تدمج حلول الدفع وتطوّر منتجات مالية مشتركة بين المنصتين

نبذة عن الشركات

اتأسست بساطة المالية القابضة سنة ٢٠١٧ كمشروع مشترك بين شركة بي إنفستمنتس القابضة وشركة إم.إم جروب للصناعة والتجارة العالمية، والاتنين مدرجين في البورصة المصرية، وتركّز على الاستثمار في قطاع الخدمات المالية غير المصرفية في مصر. وبتملك حاليًا ٧٠٪ من بساطة للتمويل متناهي الصغر

أما إيدج القابضة للاستثمارات فكانت زوّدت رأس مالها مؤخرًا بـحوالي ٢٣٥ مليون جنيه، وبتشتغل في مجالات التمويل الاستهلاكي، والتأجير التمويلي، وحلول التمويل العقاري. والشركة ناوية تجمع أكتر من ٣٠٠ مليون جنيه علشان تتوسع في تمويل المشروعات الصغيرة والمتوسطة، والتمويل الاستهلاكي، وتمويل الرهن العقاري

شركة القلعة للاستثمارات المالية أعلنت عن خسارة صافية بعد حقوق الأقلية ٤٣ مليون جنيه في الربع الأول ٢٠٢٥، مقابل صافي ربح ٧٫٢ مليار جنيه في الربع الأول ٢٠٢٤، وده نتيجة تراجع هوامش التكرير في الشركة المصرية لتكرير البترول وزيادة مستحقات الفوائد المرتطة بتسويات وإعادة
هيكلة سابقة

سعر سهم الشركة نزل بنسبة ٢٫٧٪ مع نهاية جلسة التداول يوم الخميس بعد إعلان نتائج الأرباح، لكنه لسه مرتفع بحوالي ٢٦٫٦٪ من بداية سنة ٢٠٢٥

الإيرادات

بلغت الإيرادات المجمعة ٣٧٫٢ مليار جنيه في الربع الأول ٢٠٢٥، بانخفاض طفيف عن ٣٧٫٦ مليار جنيه في نفس الفترة من ٢٠٢٤. الإيرادات بدون احتساب الشركة المصرية لتكرير البترول ارتفعت ٢٤٪ على أساس سنوي لتصل إلى ٣٫٩ مليار جنيه، بدعم من تحسّن الأداء في بقية الشركات التابعة

أداء الشركات التابعة

الشركة المصرية لتكرير البترول: سجّلت إيرادات بالدولار تعادل ٣٣٫٣ مليار جنيه وخسارة صافية ١٫١ مليار جنيه في الربع الأول ٢٠٢٥، مقابل صافي ربح ٢٫١ مليار جنيه في الربع الأول ٢٠٢٤، ويرجع ذلك أساساً لتراجع هوامش التكرير العالمية خلال الربع

شركة طاقة عربية (مدرجة في البورصة): سجّلت صافي ربح ١٣٦٫١ مليون جنيه بزيادة ٣٢٪ على أساس سنوي، مدفوعة بنمو أنشطة الغاز الطبيعي المضغوط والطاقة المتجددة وتوزيع الكهرباء. سعر السهم هبط ١٫٨٢٪ بنهاية جلسة الخميس، لكنه مرتفع ٩٫٧٧٪ من بداية السنة

أسيك للتعدين (مدرجة في البورصة): حقّقت صافي ربح ٣٨٫٦ مليون جنيه في الربع الأول ٢٠٢٥ على إيرادات ٩٤٤٫٢ مليون جنيه، مقابل خسارة ٢٥٫٧ مليون جنيه في الربع الأول ٢٠٢٤، بدعم من تحسّن النشاط في قطاع التعدين والإيرادات المقومة بالدولار. سعر السهم ظل شبه ثابت بنهاية الجلسة لكنه مرتفع ٤٢٫٤٨٪ من بداية السنة

شركة أسيك القابضة: سجّلت صافي ربح ٦٩٥٫٤ مليون جنيه مقارنةً بخسارة ٤٨١٫٤ مليون جنيه في الربع الأول ٢٠٢٤، نتيجة تحسّن أداء أعمال الأسمنت والهندسة

دينا فارمز: سجّلت خسارة صافية ٨٫٨ مليون جنيه مقابل صافي ربح ١٠٧٫٦ مليون جنيه في الربع الأول ٢٠٢٤، نتيجة ضغوط على الهوامش وارتفاع التكاليف التشغيلية

المسار المستقبلي

أكّدت القلعة استمرار تركيزها على خفض المديونية واستقرار العمليات. تستهدف المجموعة خفض نحو ٣٠ مليار جنيه من إجمالي الديون خلال ٢٠٢٥، بما في ذلك سداد ٣٠٠ مليون دولار من ديون الشركة المصرية لتكرير البترول و٢٤٠ مليون دولار مستحقة على شركة القلعة القابضة لإعادة الهيكلة المحدودة

الشركة ناوية تطرح أربع شركات تابعة ليها من اللي معدل نموهم عالي في البورصة خلال السنتين الجايين علشان تجمع تمويل جديد وتزود مرونتها المالية. في نفس الوقت، شركة  المصرية التكرير شغالة على مشاريع جديدة لتحسين هوامش الربح، ومتوقع نتائج أقوى مع نهاية ٢٠٢٥. كمان السيولة عند القلعة اتحسنت فعلًا، ومن المنتظر تزيد أكتر لما شركة التكرير تبدأ توزع أرباح في ٢٠٢٦، إدارة الشركة قالت

 شركة أبو قير للأسمدة والصناعات الكيماوية حققت صافي ربح بعد الضريبة ١٫٣ مليار جنيه في أول ربع من السنة المالية ٢٠٢٥/٢٠٢٦، بزيادة ٢٪ مقارنة بـ١٫٢٨ مليار جنيه في نفس الفترة من السنة اللي فاتت

إجمالي الإيرادات ارتفع لـ٣٫٩١ مليار جنيه مقابل ٣٫٦٢ مليار جنيه في الربع الأول من السنة المالية ٢٠٢٤/٢٠٢٥

سعر سهم الشركة زاد بنسبة ٠٫٢١٪ مع نهاية جلسة الخميس، لكنه لسه منخفض بنسبة ٠٫٦٣٪ من بداية سنة ٢٠٢٥

أسباب النمو في الربع الأول

تشغيل كل مصانع الشركة بكامل طاقتها بعد استقرار إمدادات الغاز الطبيعي والانتهاء من أعمال الصيانة الكبرى

استمرار تحسين كفاءة استخدام الطاقة والتوفير في تكاليف المياه والكهرباء وكيماويات المعالجة، وده ساعد الشركة تواجه ارتفاع أسعار الغاز اللي بدأ من ١٦ سبتمبر ٢٠٢٥

تحسّن متوسط أسعار التصدير مقارنة بنفس الربع من السنة اللي فاتت

نجاح استراتيجية التسويق في تحقيق أسعار أفضل لمنتجات الشركة المتنوعة والتوسع في فتح أسواق تصديرية جديدة

اتباع سياسة بيعية رشيدة هدفها تعظيم العائد والحفاظ على كفاءة التشغيل

توقعات النصف التاني

قالت أبو قير في بيان منفصل إنها بتتوقع تحقق إيرادات بقيمة ١١٫١٢ مليار جنيه خلال النصف التاني من سنة ٢٠٢٥ (الفترة من ١ يوليو ٢٠٢٥ لحد ٣١ ديسمبر ٢٠٢٥)، ومصروفات إجمالية ٧٫٥٣ مليار جنيه، وصافي ربح قبل الضريبة ٣٫٥٩ مليار جنيه

خلصنا جولتنا في السوق النهارده

استنوا التحديثات الجديدة بكرة